ഫേസ്ബുക്ക് ഉണ്ടാകുന്നതിന് മുന്നും പിന്നും എന്റെ ഏറ്റവുമടുത്ത ഫ്രണ്ട് ബിനോയിയാണ്. കോതമംഗലത്ത് എന്‍ജിനീയറിംഗിന് പഠിക്കുന്ന കാലത്തുള്ള കൂട്ടാണ്. എന്‍ജിനീയറിംഗ് കഴിഞ്ഞാലുടന്‍ ജോലിക്ക് കയറണമെന്നായിരുന്നു എന്റെ ആഗ്രഹം. എന്‍ജിനീയറിംഗ് കഴിഞ്ഞ് തുടര്‍ന്നും പഠിക്കണമെന്നായിരുന്നു ബിനോയിയുടെ ആഗ്രഹം. എന്നാല്‍ GATE എഴുതിയ സ്‌കോര്‍ വന്നപ്പോള്‍ തുടര്‍ന്ന് പഠിക്കാനുള്ള അവസരം കിട്ടിയത് എനിക്കാണ്. ആദ്യം ജോലി കിട്ടിയത് ബിനോയിക്കും. ജീവിതം പലപ്പോഴും ഇങ്ങനെയൊക്കെയാണ്.

പഠിക്കുന്ന കാലത്തുതന്നെ എപ്പോള്‍ നാട്ടില്‍ വന്നാലും ഞാന്‍ ബിനോയിയെ കാണാന്‍ പോകും, ഇപ്പോഴും ആ പതിവ് തുടരുന്നു. 

പിഎച്ച്ഡി യുടെ തീസിസ് സബ്മിറ്റ് ചെയ്തതിനു ശേഷം ഞാന്‍ ബിനോയിയെക്കാണാന്‍ പോയി. കോളേജില്‍നിന്നും തിരിച്ച് ഓട്ടോയില്‍ ഞങ്ങള്‍ ഒരുമിച്ചാണ് വന്നത്. കുന്നിറങ്ങുന്ന സമയത്ത് അവന്‍ ചോദിച്ചു,

'അപ്പോ പണി വല്ലതും ആയോ?'

'ഇല്ല'

'അതുശരി, അപ്പോപ്പിന്നെ തൊഴിലില്ലായ്മ വേതനത്തിന് അപേക്ഷിക്കാമല്ലോ'

ഇതൊക്ക കേട്ടുകൊണ്ടിരുന്ന ഓട്ടോക്കാരന്‍ ചേട്ടന്‍ പറഞ്ഞു, 'മോനെ  തൊഴിലില്ലായ്മ വേതനത്തിനൊന്നും അപേക്ഷിക്കേണ്ട, ലോണെടുത്ത് ഒരു ഓട്ടോറിക്ഷ വാങ്ങാന്‍ നോക്ക്. ചെലവുകാശ് ഈസിയായിട്ട് ഒക്കും'

ഈ കഥ പറഞ്ഞ് ഞാനും ബിനോയിയും ഇപ്പോഴും ചിരിക്കാറുണ്ട്.

പക്ഷെ, ഇതൊരു തമാശയല്ല. എന്‍ജിനീയര്‍ ആണ്, ഐഐടിയാണ്, പിഎച്ച്ഡി ആണ് എന്നൊന്നും പറഞ്ഞിട്ട് ഒരു കാര്യവുമില്ല. ഇന്ത്യയില്‍ ഗവേഷണം കഴിയുന്നവര്‍ക്ക് ജോലിസാധ്യത ഏറെയൊന്നുമില്ല. ബിടെക്ക് കാരുടെയും എംടെക്ക് കാരുടെയും ഒക്കെ കാര്യത്തില്‍ ഉള്ള പോലെ ഒരു പ്ലേസ്‌മെന്റ് സര്‍വീസ് ഒന്നും ലോകത്ത് ഒരിടത്തും പിഎച്ച്ഡി ക്കാര്‍ക്ക് ഇല്ല. പഠിച്ച സ്ഥാപനത്തിന്റെയും പഠിപ്പിച്ച ഗൈഡിന്റെയും റെപ്യൂട്ടേഷന്‍ അനുസരിച്ചിരിക്കും നമ്മുടെ തൊഴില്‍ സാധ്യത. അത് നമ്മള്‍ തന്നെ കണ്ടു പിടിക്കണം.  ഐഐടിയില്‍ നിന്നുള്ള എന്‍ജിനീയര്‍മാര്‍  പിഎച്ച്ഡി ക്കാരുടെ കാര്യം ഇതാണെങ്കില്‍, മറ്റു വിഷയങ്ങളില്‍പ് എച്ച്ഡി എടുക്കുന്നവരുടെയോ മറ്റു യൂണിവേഴ്‌സിറ്റികളില്‍ ഉള്ളവരുടെയോ കാര്യം പറയേണ്ടല്ലോ. 

മിഡില്‍ ക്ലാസോ അതിനു താഴെയുള്ളതോ ആയ കുടുംബത്തില്‍ നിന്നും ബിരുദാനന്തര ബിരുദത്തിനു ശേഷം ജോലിക്കു ചേരാതെ പി.എച്ച്.ഡിക്കു പോകുന്നത് മണ്ടത്തരം ആണെന്ന്  എനിക്ക് പലപ്പോഴും തോന്നിയിട്ടുണ്ട്. ഞാന്‍ എന്തുതന്നെ ചെയ്താലും പിന്തുണക്കുന്ന മാതാപിതാക്കളാണ് ഭാഗ്യവശാല്‍ എനിക്കുണ്ടായിരുന്നത്. ഏഴാമത്തെ മകനായതുകൊണ്ടും മറ്റു സഹോദരന്മാര്‍ക്കെല്ലാം ജോലിയുണ്ടായിരുന്നതുകൊണ്ടും ഞാന്‍ കേന്ദ്ര ഗവണ്മെന്റിലെ ഗസറ്റഡ് ഉദ്യോഗം രാജിവെച്ച് ഗവേഷണത്തിന് പോയത് കുടുംബത്തിന് സാമ്പത്തിക ബുദ്ധിമുട്ട് ഒന്നുമുണ്ടാക്കിയില്ല. എങ്കിലും ആയിരത്തോളം അംഗങ്ങളുള്ള തുമ്മാരുകുടി കുടുംബത്തില്‍ ഒരാള്‍ പോലും പോകാത്ത എന്‍ജിനീയറിംഗ് പിഎച്ച്ഡിക്ക് ഞാനെന്തിന് ഇറങ്ങിപ്പുറപ്പെട്ടു എന്ന് എന്റെ ചുറ്റുമുള്ള ആര്‍ക്കും മനസ്സിലായില്ല. 

ഇന്ത്യയിലിപ്പോള്‍ ഗവേഷണം ചെയ്യുന്നതോ ഗവേഷണം കഴിഞ്ഞ് ജോലി അന്വേഷിക്കുന്നതോ ആയ മിക്കവാറും കുട്ടികളുടെ സ്ഥിതി ഇതായിരിക്കും. എന്തിനാണ് അവര്‍ ഈ ഗവേഷണം എന്നും പറഞ്ഞു നടക്കുന്നതെന്ന് അവരുടെ വീട്ടുകാര്‍ക്കോ കൂട്ടുകാര്‍ക്കോ മനസ്സിലാവില്ല. ഗവേഷണം ഒക്കെ കഴിയുമ്പോഴേക്ക്  അവരുടെ കൂട്ടുകാരൊക്കെ ഒന്നുകില്‍ ജോലിയിലായിട്ടുണ്ടാകും, അല്ലെങ്കില്‍ കല്യാണം കഴിച്ചിട്ടുണ്ടാകും. പിഎച്ച്ഡി എടുക്കാന്‍ മിനിമം നാലുവര്‍ഷം കൂട്ടിയാല്‍ ഇരുപത്തിയേഴു വയസ്സെങ്കിലുമാകും നമ്മള്‍ തൊഴില്‍ മാര്‍ക്കറ്റിലെത്താന്‍. എന്നാലിവിടെ വല്ല മുന്‍ഗണയുമുണ്ടോ? ഇന്ത്യയിലെന്നല്ല, ലോകത്തെമ്പാടും ബിരുദാനന്തര ബിരുദം കഴിഞ്ഞുള്ള പഠനം കൊണ്ട് ശമ്പളം കൂടുകയല്ല, കുറയുകയാണ് ചെയ്യുന്നതെന്ന് പഠനങ്ങള്‍ തെളിയിച്ചിട്ടുണ്ട്.

തൊഴില്‍ കമ്പോളത്തില്‍ പോട്ടെ  വിവാഹ ക്കമ്പോളത്തിലും  പിഎച്ച്ഡിക്കാരുടെ സ്ഥിതി പരിതാപകരമാണ്. 'പിഎച്ച്ഡി ഒക്കെ ചെയ്യുന്ന പയ്യന്മാര്‍ പഠിപ്പിസ്റ്റുകളാണ്, ഒട്ടും റൊമാന്റിക് അല്ല, പൊടി വട്ടും കാണും' എന്നതാണ് പൊതുവെ പെണ്‍കുട്ടികളുടെ ധാരണ. പിഎച്ച്ഡി കഴിയുന്ന പെണ്‍കുട്ടികളാകട്ടെ, നാട്ടിലെ 'ഐഡിയല്‍' വിവാഹപ്രായം കഴിഞ്ഞാണ് ഫീല്‍ഡിലെത്തുന്നത്. 'പഠിപ്പിസ്റ്റ്', 'റൊമാന്റിക്കല്ല' എന്നുള്ള ആരോപണങ്ങള്‍ അവര്‍ക്കെതിരെയും ഉണ്ട്. കൂടാത്തതിന്, തന്നേക്കാളും പഠിത്തമുള്ളവരെ കല്യാണം കഴിക്കാനുള്ള മലയാളിപ്പയ്യന്മാരുടെ വിമുഖത എല്ലാം കൂടിയാകുമ്പോള്‍ അവരുടെ കാര്യം ആണ്‍കുട്ടികളുടേതിനേക്കാള്‍ പരിതാപകരം ആണ്.

ഇനി ഗവേഷണത്തിന്റെ കാര്യമെടുക്കാം. പിഎച്ച്ഡിക്ക് പഠിക്കുന്നവര്‍ അവരുടെ ഗൈഡുമാരുടെയും ഗൈഡുമാര്‍ക്ക് പാരവെക്കാന്‍ നടക്കുന്ന മറ്റു പ്രൊഫസ്സര്‍മാരുടെയും കൈയില്‍ നിന്നും സഹിക്കേണ്ടിവരുന്ന മാനസിക പീഡനങ്ങള്‍ വെച്ചു നോക്കുമ്പോള്‍ നമ്മുടെ സ്വാശ്രയകോളേജ് ഒക്കെ വെറും ഗ്രാസ്സാണ്.  എടുത്താല്‍ പൊങ്ങാത്ത ഈഗോ ആണ്  പ്രൊഫസ്സര്‍മാരുടെ ഒരു മുഖമുദ്ര. പരസ്പരം പാരവെപ്പാണ് ഏതൊരു അക്കാദമിക് ഡിപ്പാര്‍ട്ട്‌മെന്റിലെയും പ്രധാന വിനോദം. ഇതിനൊന്നും കേരളാ യുണിവേഴ്‌സിറ്റിയെന്നോ ഐഐറ്റിയെന്നോ ഹാര്‍വാര്‍ഡ് എന്നോ വ്യത്യാസമില്ല. ദിവസവും പന്ത്രണ്ട് മുതല്‍ പതിനാലു വരെ മണിക്കൂര്‍ കുട്ടികള്‍ ലാബില്‍ പണിയെടുത്താലും ഇപ്പോഴത്തെ കുട്ടികള്‍ ഒക്കെ  'ലേസി ബംസ്' ആണെന്ന് പറയുന്ന ഗൈഡുകള്‍ തൊട്ട് കൂടെ ഗവേഷണത്തിനു വരുന്ന കുട്ടികളെ ലൈംഗികമായി പീഡിപ്പിക്കാന്‍ ശ്രമിക്കുന്നവര്‍ വരെ നമ്മുടെയിടയിലുണ്ട്. ഇതിനിടയില്‍ക്കൂടി വേണം ഗവേഷണം നടത്താന്‍.

ഐഐടിയില്‍ ഞങ്ങള്‍ അനുഭവിക്കാത്ത പല ബുദ്ധിമുട്ടുകളും സാധാരണ യൂണിവേഴ്‌സിറ്റികളിലുണ്ട്. രോഹിത് വെമുലയൊക്കെ സര്‍ക്കാരില്‍ നിന്നും കിട്ടാനുള്ള ഗ്രാന്റ് കിട്ടാതെ ബുദ്ധിമുട്ടിയ കാര്യം ആത്മഹത്യാക്കുറിപ്പില്‍ പറഞ്ഞിരുന്നല്ലോ. കേരളത്തിലെ ഒരു യുണിവേഴ്‌സിറ്റിയില്‍ 'സ്റ്റാംപ്' വാങ്ങാന്‍ കാശില്ലാത്തതിനാല്‍ കുട്ടികളുടെ തീസിസ് മാസങ്ങളോളം ഇവാലുവേഷനായി അയച്ചുകൊടുക്കാതിരുന്ന കഥ ഞാന്‍ കേട്ടിട്ടുണ്ട്. ചുരുങ്ങിയത് ഐഐടിയില്‍ അത്തരം ബുദ്ധിമുട്ടുകള്‍ ഇല്ല. കാണ്‍പൂരില്‍ ആണെങ്കില്‍ സ്ത്രീ പുരുഷ വേര്‍തിരിവുകളും കുറവാണ്. രാത്രി പ്രന്ത്രണ്ടു മണിക്കാണ് ലൈബ്രറി അടക്കുന്നത് അതുവരെ ആണ്‍കുട്ടികള്‍ക്കും പെണ്‍കുട്ടികള്‍ക്കും അവിടെ ഇരിക്കാം. ലാബ് ഇരുപത്തിനാലു മണിക്കൂറും തുറന്നിട്ടിരിക്കയാണ്, ആര്‍ക്കും ജോലി ചെയ്യാം. ഇവിടെ അതിനൊക്കെ നിരോധനം ആണല്ലോ.

ഇങ്ങനെയൊക്കെ കഷ്ടപ്പെട്ട് തീസിസും സമര്‍പ്പിച്ചുവരുന്ന ഞങ്ങള്‍ക്ക് ഓട്ടോറിക്ഷ ഓടിക്കുന്നതിലും മെച്ചപ്പെട്ട ഒരു ജോലിക്ക് അര്‍ഹതയില്ലേ ?

ഞാന്‍ മുകളില്‍ പറഞ്ഞ പ്രശ്‌നങ്ങള്‍ പലതും വിദേശ രാജ്യങ്ങളിലുമുണ്ട്. അമേരിക്കയിലൊക്കെ പുറത്തിറങ്ങുന്ന പിഎച്ച്ഡി ക്കാരില്‍ ഏറെയും യൂണിവേഴ്‌സിറ്റികളില്‍ അധ്യാപകരായി പോകാനാണ് സ്വപ്നം കാണുന്നത്. എന്നാല്‍ പിഎച്ച്ഡി ക്കാരുടെ എണ്ണം വര്‍ധിക്കുന്നതനുസരിച്ച്  യുണിവേഴ്‌സിറ്റികളുടെയും അധ്യാപകരുടേയുമൊന്നും എണ്ണം വര്‍ധിക്കാത്തതുകൊണ്ട് പിഎച്ച്ഡി കഴിഞ്ഞ അനവധിയാളുകള്‍ താല്‍ക്കാലികമായ ഗവേഷണത്തില്‍ നിന്നും (പോസ്റ്റ് ഡോക്ടറല്‍ ഫെല്ലോഷിപ്പ് അഥവാ പിഡിഎഫ്) താല്‍ക്കാലികമായ റിസേര്‍ച്ച് ജോലികളിലേക്ക് മാറിപ്പോകുകയാണ്. നാല്‍പതു വയസ്സൊക്കെയാകും ഒരു ഫാക്കല്‍റ്റി പൊസിഷന്‍ കിട്ടാനും സ്വന്തമായി ഗ്രൂപ്പ് ഉണ്ടാക്കി ഫണ്ടിങ്ങിന് അപേക്ഷിക്കാനും ഒക്കെ. 

ഇത്രയും ഒക്കെ പറഞ്ഞു പിഎച്ച്ഡി ക്കു പോകാന്‍ ശ്രമിക്കുന്നവരെ പരമാവധി നിരാശരാക്കിയ  സ്ഥിതിക്ക് ഇനി ഇതില്‍ എത്തിപ്പറ്റിയവര്‍ക്കും ഇനിയും ഇതുവഴി വരുന്നവര്‍ക്കും വേണ്ടി ചില നിര്‍ദേശങ്ങള്‍ പറയാം.

1. ലോകത്ത് നൂറിലൊരാള്‍ക്കുപോലും പിഎച്ച്ഡി ഇല്ല. ഇന്ത്യയിലാകട്ടെ ഇത് അഞ്ഞൂറിലൊന്നിലും ാഴെയാണ്. ചുമ്മാതല്ല കാശും പ്രശസ്തിയുമൊക്കെയുണ്ടെങ്കിലും സിനിമാക്കാരും രാഷ്ട്രീയക്കാരും ഒരു 'ഹോണററി ഡോക്ടറേറ്റ്' തപ്പിനടക്കുന്നത്. അതുകൊണ്ട് അധ്വാനിച്ച് ഡോക്ടറേറ്റ് നേടുന്നത് ഒരഭിമാനം തന്നെയാണ്. അങ്ങനെ പഠിച്ചു ഡോക്ടറായതാണെങ്കില്‍ അത് മറ്റുള്ളവര്‍ എങ്ങനെ കണ്ടാലും നിങ്ങള്‍ അഭിമാനമായി കാണുക (ഒരു കാര്യം പറയട്ടെ, ഗള്‍ഫിലും, ചൈനയിലും ജപ്പാനിലും പിഎച്ച്ഡി ക്കാര്‍ക്ക് ഒരു വിലയൊക്ക ഉണ്ട്. യൂറോപ്പില്‍ പിഎച്ച്ഡി ഉള്ളവര്‍ ഗവേഷണ സ്ഥാപനങ്ങള്‍ക്ക് പുറത്തധികം കാണാത്തതിനാല്‍ അവിടെ പേരിന്റെ കൂടെ Dr എന്നോ PhD എന്നോ വയ്ക്കുന്ന പതിവില്ല.)

2.  പിഎച്ച്ഡി ഗവേഷണമെന്നാല്‍ പഴയകാലത്തെ പോലെ 'വിപ്ലവകരമായ' എന്തെങ്കിലുമൊരു കാര്യം കണ്ടുപിടിക്കുക എന്നതല്ല. തനിച്ച് കൂടുണ്ടാക്കുന്ന കിളിയെപ്പോലെ ഉള്ള ജോലിയല്ല  നൂറു കണക്കിന് തേനീച്ചകള്‍  കിലോമീറ്ററുകളോളം സഞ്ചരിച്ച് ഒരുനുള്ള് മെഴുക് കൊണ്ടുവന്ന് ഒരുമിച്ച്  തേനീച്ചക്കൂടുണ്ടാക്കുന്ന ജോലിയാണ് ഇക്കാലത്ത് ഗവേഷണം. നമ്മള്‍ ഓരോരുത്തരും ചെയ്യുന്നതിന്റെ അര്‍ത്ഥമോ ഫലമോ നമ്മള്‍ അറിയുകയോ കാണുകയോ ചെയ്തില്ല എന്നുവരാം. ചെറിയ ചെറിയ കണ്ടുപിടുത്തങ്ങളിലൂടെ പതുക്കെപ്പതുക്കെ നാം ആ തേന്‍കൂട് ഉണ്ടാക്കുകയാണ്. അതിലെ തേനാണ് സമൂഹം മുഴുവന്‍ ആസ്വദിക്കുന്നത്. അതുകൊണ്ട് നിങ്ങള്‍ക്ക് 'നൊബേല്‍ പ്രൈസ്' കിട്ടിയില്ലെങ്കിലും നിങ്ങള്‍ ഒരു പേറ്റന്റെടുത്ത് ധനികരായില്ലെങ്കിലും നിങ്ങളുടെ ഗവേഷണം അര്‍ത്ഥശൂന്യമാകുന്നില്ല.

3.  പിഎച്ച്ഡി എന്നത് ചുരുങ്ങിയത് അഞ്ചു വര്‍ഷത്തെയെങ്കിലുംകമ്മിറ്റ്‌മെന്റാണ്. അതും മുന്‍പ് പറഞ്ഞതുപോലെ സാമ്പത്തികലാഭമുണ്ടാക്കാത്തതും അതേസമയം വ്യക്തിജീവിതത്തില്‍ നഷ്ടമുണ്ടാക്കുന്നതുമാണ്. അതുകൊണ്ട് പി എച് ഡി ക്ക് ചേരാനുള്ള തീരുമാനം നിസ്സാരമായി എടുക്കരുത്.
4. ഇ്യയിലെ പി എച് ഡി പഠനകാലത്ത് ധാരാളം സമയമുണ്ടെങ്കിലും ഗവേഷണവിഷയത്തിലൊഴിച്ച് മറ്റു കാര്യങ്ങളില്‍ ചെലവഴിക്കാന്‍ നമ്മള്‍ താല്പര്യം കാണിക്കാറില്ല. അതിനു നമ്മളെ യൂണിവേഴ്‌സിറ്റി നിര്‍ബന്ധിക്കുന്നില്ല. അങ്ങനെ വല്ലതും ചെയ്യുന്നത് കമ്മിറ്റ് മെന്റിന്റെ കുറവായിട്ടാണ് മിക്ക ഗൈഡുകളും കാണുന്നത്. ഇത് ശുദ്ധമണ്ടത്തരമാണ്. ചില കാര്യങ്ങളിലെങ്കിലും കൃത്യമായ അറിവ്
 നേടാന്‍ നമ്മള്‍ ശ്രമിക്കണം. 
1. ആധുനിക ഗവേഷണത്തിന്റെ രീതികള്‍ (modern research methods )
2. Statistical technique and qualtiy cotnrol
3. ഗവേഷണ പ്രബന്ധങ്ങള്‍ എഴുതുന്നതെങ്ങനെ?
4. റിസേര്‍ച്ച് പ്രൊപ്പോസലുകള്‍ തയ്യാറാക്കുന്നത് എങ്ങനെ?
5. ആളുകളുടെ മുന്നില്‍ സഭാകമ്പം കൂടാതെ കാര്യങ്ങള്‍ കൃത്യമായി അവതരിപ്പിക്കുന്നത് എങ്ങനെ?

ഇതിനെപ്പറ്റിയൊക്കെ ഓരോ ഗവേഷണകേന്ദ്രത്തിലും ക്ലാസ്സുകള്‍ വേണ്ടതാണെങ്കിലും ഇന്ത്യയിലെ അനവധി യൂണിവേഴ്‌സിറ്റികളില്‍ പി എച് ഡിക്ക് ഒരു കോഴ്‌സ് വര്‍ക്കും ഇല്ല. ഇപ്പോള്‍ പക്ഷെ ഓണ്‍ലൈനായി ഇതിനെല്ലാം നല്ല പരിശീലനമുണ്ട്. അതുപയോഗിക്കുക. 

5. ഇംഗ്ലീഷില്‍ പ്രാവീണ്യം നേടുന്നത് ഏറ്റവും അത്യാവശ്യമാണ്.പക്ഷെ, അതുകൂടാതെ ഏതെങ്കിലുമൊരു ഭാഷ കൂടി പഠിച്ചാല്‍ നിങ്ങളുടെ ചാന്‍സ് പല മടങ്ങാക്കാം. ജാപ്പനീസ്, ജര്‍മ്മന്‍, ചൈനീസ്, ഫ്രഞ്ച്, സ്പാനിഷ്, സ്വീഡിഷ്, ഇറ്റാലിയന്‍ ഇവയിലേതെങ്കിലുമൊന്ന് നിങ്ങളുടെ ഗവേഷണ വിഷയത്തിലെ സാധ്യതകള്‍ക്കനുസരിച്ച് പഠിക്കണം. ഉദാഹരണത്തിന് സിവില്‍ എന്‍ജിനീയറിംഗാണെങ്കില്‍ ജാപ്പനീസ്, മെക്കാനിക്കല്‍ ആണെങ്കില്‍ ജര്‍മ്മന്‍, ഹ്യുമാനിറ്റിസാണെങ്കില്‍ ഫ്രഞ്ച് എന്നിങ്ങനെ. ഈ രാജ്യങ്ങളില്‍ പിഎച്ച്ഡി കഴിഞ്ഞവര്‍ക്ക് അവസരമുണ്ടെന്നത് മാത്രമല്ല, നിങ്ങള്‍ ആ ഭാഷ പഠിക്കാന്‍ മുന്‍കൈയെടുത്തു എന്നത് നിങ്ങള്‍ക്ക് വലിയ ക്രെഡിറ്റായിരിക്കും.

6. മറ്റേത് തൊഴിലിലേയും പോലെ നെറ്റ്‌വര്‍ക്കിങ് ഗവേഷണത്തിലും ഏറ്റവും അത്യാവശ്യമാണ്. ഗവേഷണത്തില്‍ നമ്മുടെ ലൈന്‍ കണ്ടെത്തിയാലുടന്‍ ആ വിഷയത്തിലെ ന്യൂസ് ഗ്രൂപ്പില്‍ പോയി അംഗമാകുക, ഫേസ്ബുക്ക് കൂട്ടായ്മയുണ്ടെങ്കില്‍ ചേരുക, ആ വിഷയവുമായി ബന്ധപ്പെട്ട അന്താരാഷ്ട്ര അസോസിയേഷന്‍ കണ്ടുപിടിച്ച് അതില്‍ സ്റ്റുഡന്റ് മെമ്പര്‍ഷിപ്പ് എടുക്കുക. ഈ പറഞ്ഞ സ്ഥലത്തൊക്കെ ചോദ്യം ചോദിച്ചും ഉത്തരം പറഞ്ഞും കമന്റിട്ടും മറ്റുള്ളവരുടെ ശ്രദ്ധ പിടിച്ചുപറ്റുക.

7. ഗവേഷണ സമയത്ത് തന്നെ വര്‍ഷത്തില്‍ രണ്ടു പ്രാവശ്യമെങ്കിലുംഇന്ത്യക്കകത്ത് സെമിനാറിലോ വര്‍ക്ക് ഷോപ്പിലോ ഒക്കെ പോകുക. എങ്ങനെയെങ്കിലും വിദേശത്ത് ഒരു കോണ്‍ഫറന്‍സിനെങ്കിലും പോകാനുള്ള അവസരം സംഘടിപ്പിക്കുക. പറ്റിയാല്‍ ഒരു ഇന്റേണ്‍ഷിപ്പ് ഒക്കെ സംഘടിപ്പിയ്ക്കാന്‍ നോക്കുക. ലോകത്തെ തന്നെ ഏറ്റവും വലിയ ഗവേഷണകേന്ദ്രമായ് യൂറോപ്യന്‍ ന്യൂക്ലിയര്‍ റിസര്‍ച്ച് സെന്റര്‍  (https://home.cern) ജനീവയില്‍ എന്റെ വീട്ടില്‍ നിന്നും അഞ്ചു കിലോമീറ്റര്‍ മാത്രം അകലെയാണ്. അവിടെ എല്ലാ വര്‍ഷവും അനവധി ആളുകള്‍ക്ക് ഇന്റേണ്‍ഷിപ്പ് ലഭ്യമാണ്. അപേക്ഷിക്കുക, കിട്ടിയാല്‍ രണ്ടാമന്റെ കൂടെ താമസവും തരമാക്കാം.  ഇന്ത്യയിലെ നല്ല ഗവേഷണസ്ഥാപനങ്ങള്‍ പലതും ഇതിനുള്ള ചെലവ് വഹിക്കും. ട്രാവല്‍ അലവന്‍സ് തരുന്ന സര്‍ക്കാര്‍ സംവിധാനങ്ങളുണ്ട്. പ്രൈവറ്റ് ഫൗണ്ടേഷനുകള്‍ ഉണ്ട്. നമ്മള്‍ സ്‌കോളര്‍ഷിപ്പ് തുക അല്പം മിച്ചം പിടിക്കണം. വേണ്ടിവന്നാല്‍ അച്ഛനോടും അമ്മയോടും ചോദിക്കണം. ജനീവയില്‍ ഇന്റേണ്‍ഷിപ്പിന് വരാനായി കാനഡയിലെ ഒരു കുട്ടി  ഓണ്‍ലൈനായി ഒരു ക്രൗഡ് ഫണ്ടിംഗ് കാംപയിന്‍ നടത്തി. സമൂഹമാധ്യമം ഇങ്ങനെ ഒക്കെ ക്രിയാത്മകമായി ഉപയോഗിക്കണം. ഒരുലക്ഷം രൂപ സംഘടിപ്പിച്ചെടുക്കുക എന്നത് ഇക്കാലത്ത് ഒരു ബുദ്ധിമുട്ടല്ല. ഇന്ത്യയില്‍ നിന്നുള്ള കുട്ടികള്‍ക്ക് കോണ്‍ഫറന്‍സ് ഫീ ഇളവുചെയ്യാനും വേണ്ടിവന്നാല്‍ ഹോട്ടല്‍ ചെലവ് നല്‍കാനും വികസിതരാജ്യങ്ങളിലെ കോണ്‍ഫറന്‍സ് ഓര്‍ഗനൈസര്‍മാര്‍ക്ക് സാധിക്കും. ഇതൊക്കെ ഉപയോഗിക്കുക. പോകുന്നിടത്തെല്ലാം അറിവ് സമ്പാദിക്കുന്നതിനോടൊപ്പം നെറ്റ്‌വര്‍ക്ക് ഉണ്ടാക്കിയെടുക്കുക കൂടി ചെയ്യണം.

8. പഠിക്കുന്ന സമയത്തു തന്നെ ജേര്‍ണലുകളില്‍ ലേഖനമെഴുതി പ്രസിദ്ധീകരിക്കണം. നമ്മുടെ പിഎച്ച്ഡിക്ക് വേണ്ടി നമ്മള്‍ ചെയ്യുന്ന ലിറ്ററേച്ചര്‍ റിവ്യൂ പോലും പബ്ലിഷ് ചെയ്യാന്‍ ഇപ്പോള്‍ ഓണ്‍ലൈനും പ്രിന്റുമായുള്ള ജേര്‍ണലുകളുണ്ട്. എഴുതി തെളിയേണ്ടത് ഇങ്ങനെയൊക്കെയാണ്.

9. പിഎച്ച്ഡി ഗവേഷണകാലത്ത് രണ്ടു നല്ല പേപ്പറുകളെങ്കിലും ഉണ്ടാക്കിയെടുക്കാന്‍ നമ്മള്‍ ശ്രമിക്കണം. ഇതും ഇപ്പോഴത്തെ കാലത്ത് അത്ര ബുദ്ധിമുട്ടുള്ള കാര്യമല്ല.

10. ഐഐടികളിലും മറ്റു പേരുകേട്ട ഗവേഷണസ്ഥാപനങ്ങളിലും ഒഴികെ ഇന്ത്യയില്‍ ഗവേഷണം ചെയ്യുന്നത് തൊഴില്‍ സാധ്യതയുടെ അടിസ്ഥാനത്തില്‍ വലിയ റിസ്‌കാണ്. മറ്റുള്ള സ്ഥാപനങ്ങളില്‍ ഗവേഷണത്തിന് പോകുന്നതിന് മുന്‍പ് അവിടുത്തെ സൗകര്യങ്ങളും തൊഴില്‍ സാധ്യതകളും ഒക്കെ അപ്പോള്‍ അവിടെ പടിക്കുന്നവരോട് അന്വേഷിച്ചു മനസ്സിലാക്കണം.

11. സാധിക്കുന്നവരെല്ലാം വിദേശത്ത് തന്നെ ഗവേഷണത്തിന് പോകണം. ഗവേഷണ സൗകര്യങ്ങള്‍ മികച്ചതാണ് ഭാഷയില്‍ പ്രാവീണ്യം നേടാം, മറ്റു രാജ്യങ്ങളിലേക്ക് ഉള്‍പ്പെടെ നിരവധി ആളുകളുമായി നെറ്റ്‌വര്‍ക്ക് ഉണ്ടാക്കാം എന്നതൊക്കെയാണ് ഇതിന്റെ ഗുണം. മിക്കവാറും രാജ്യങ്ങളില്‍ പി എച് ഡി കഴിയുമ്പോഴേക്കും നമുക്ക് അവിടെ സ്ഥിരതാമസമാക്കാനും ജോലിചെയ്യാനുമുള്ള അനുമതി ലഭിക്കും. ആ നാട്ടിലെ പി എച് ഡി ആണ് കൂടുതല്‍ വിലമതിക്കുന്നത് എന്നതിനാല്‍ തൊഴിലവസരങ്ങള്‍ കൂടും. എന്തിന്, ഇന്ത്യയിലെ വന്‍കിട ഗവേഷണസ്ഥാപനങ്ങള്‍ ഒക്കെത്തന്നെ വിദേശത്തുനിന്നുള്ള പി എച് ടിക്ക് വലിയ പ്രീമിയമാണ് കൊടുക്കുന്നത്. അപ്പോള്‍ ഇന്ത്യയില്‍ ജോലിചെയ്യാനാണ് താല്പര്യമെങ്കിലും വിദേശത്ത് പി എച് ഡി ചെയ്യുന്നത് തന്നെയാണ് നല്ലത്. മിക്കവാറും രാജ്യങ്ങള്‍ ഔദ്യോഗികമായി തന്നെ ഇന്ത്യക്കാര്‍ക്ക് പി എച്ച് ഡി ക്ക് ഫെല്ലോഷിപ്പ് നല്‍കുന്നുണ്ട്. അത് കൂടാതെ യൂണിവേഴ്‌സിറ്റികള്‍ നല്‍കുന്ന ഫെല്ലോഷിപ്പുകള്‍, പ്രൊഫസര്‍മാര്‍ അവരുടെ റിസര്‍ച്ച് പ്രൊജക്ടില്‍ നിന്നും ലഭ്യമാക്കുന്ന റിസര്‍ച്ച് അസ്സിസ്റ്റന്റ്‌സ് എന്നിങ്ങനെ വിദേശത്ത് പോകാന്‍ അനവധി സാമ്പത്തിക സഹായ പദ്ധതികള്‍ ഉണ്ട്. ഇതിന്റെ എല്ലാം ലിങ്ക് വരും ദിവസങ്ങളില്‍ Networking and Mentoring പേജില്‍ ലഭ്യമാക്കും.

12. ബിരുദാനന്തര ബിരുദത്തിനു ശേഷം നേരിട്ട് ഫുള്‍ ടൈം പി എച്ച് ഡി ക്ക് പോകാതെ ജോലിക്കു പോയി അവിടെ നിന്നും അവധിയെടുത്തോ തൊഴിലോട് കൂടിയോ ഫുള്‍ ടൈം പിഎച്ച്ഡി ചെയ്യുന്നവരും പാര്‍ട്ട് ടൈം ആയി ചെയ്യുന്നവരും ഒക്കെ ഉണ്ട്. പക്ഷെ ഇവരില്‍ പലരും പിഎച്ച്ഡി ആ സ്ഥാപനത്തിലെ പ്രമോഷന് വേണ്ടി ഉപയോഗിക്കാനല്ലാതെ വിദേശത്ത് പോകാന്‍ ഒന്നും ശ്രമിക്കാറില്ല. ഇത് മാറണം. പിഎച്ച്ഡി യുടെ യഥാര്‍ത്ഥ ഗുണം കിട്ടുന്നത് അതുപയോഗിച്ച് ലോകത്ത് നല്ല നിലയില്‍ നടക്കുന്ന ഗവേഷണ സ്ഥാപനങ്ങളില്‍ കുറച്ചു കാലം എങ്കിലും ജോലി ചെയ്യുമ്പോള്‍ ആണ്.

13. അടിസ്ഥാന ബിരുദം കഴിഞ്ഞാല്‍ തന്നെ കേരളത്തില്‍ നമ്മള്‍ അണ്‍ എംപ്ലോയബിള്‍ ആയെന്നു പറഞ്ഞല്ലോ. അത് കൊണ്ട് തന്നെ ആയിരക്കണക്കിന് മലയാളികള്‍ ആയ  പിഎച്ച്ഡി ക്കാര്‍ ഉന്നത നിലകളില്‍ ലോകത്ത് എവിടെയും ഉണ്ട്. ഇവരെല്ലാം പുതിയ കുട്ടികളെ സഹായിക്കാന്‍ തയ്യാറുമാണ്. 'സാര്‍ ഒരു സ്‌കോളര്‍ഷിപ്പ് വേണം' എന്ന തരത്തില്‍ മടിയന്‍ എഴുത്തുകള്‍ അല്ലാതെ സ്വന്തം പ്രൊഫഷനില്‍ ഉത്തരവാദിത്തവും താല്പര്യവും ഒക്കെ കാണിച്ച് ഇവര്‍ക്കെല്ലാം എഴുതിയാല്‍ മറുപടിയും സഹായവും കിട്ടും എന്ന കാര്യത്തില്‍ സംശയം വേണ്ട. ശ്രമിച്ചു നോക്കണം.

'I want ur help with ma carrier' എന്ന തരത്തില്‍ ന്യൂ ജനറേഷന്‍ എഴുത്തെഴുതിയാല്‍ പിന്നെ കുട്ടികളുടെ കാര്യത്തില്‍ ഇത്ര താല്പര്യം എടുക്കുന്ന ഞാന്‍  പോലും അവരെ ബ്ലോക്ക് ചെയ്യും  ഇത് സത്യം, സത്യം സത്യം.....

ഈ പരമ്പരയുടെ മുന്‍ലക്കങ്ങള്‍ 

1. അതിരുകളില്ലാത്ത ലോകം, മതിലുകളുയരുന്ന ലോകം 

2. ചാട്ടത്തിലെങ്ങാനും പിഴച്ചുപോയാല്‍ 

3. മൂട്ടയെ പിടിക്കുന്ന പട്ടിയുടെ ഓപ്പറേറ്റര്‍ 

4. ഈ കുട്ടിക്ക് ഒരു ജീവിതം കൊടുക്കൂ....

5. ഈ എന്‍ജിനീയര്‍മാര്‍ക്കെന്താ കൊമ്പുണ്ടോ?

6വൈദ്യം പഠിക്കണം ദ്രവ്യമുണ്ടാക്കുവാന്‍

7. ഞങ്ങള്‍ വക്കീലന്മാരെന്താ മോശാ?

8. എന്തുവന്നാലും നാടകക്കമ്പനി തുടങ്ങരുത്‌

9. നേഴ്‌സിങ്ങിന്റെ സാധ്യതകള്‍ അവസാനിക്കുന്നില്ല 

10. 'ബമാമ'യുടെ കോളേജ് ജീവിതം

11. ഇംഗ്ലീഷ് ഒരു ഭാഷയാണ്, ബുദ്ധിയുടെ അളവുകോലല്ല, പക്ഷേ

12. തപാല്‍ വഴി നീന്തല്‍ പഠിക്കാമോ

13. മുടിവെട്ടും ഇറച്ചിവെട്ടും....! യൂറോപ്പിലെ തൊഴില്‍ സാദ്ധ്യതകള്‍

14. ബുദ്ധിയുള്ളവരെ ഉദ്ധരിക്കുന്നത് ബുദ്ധിയില്ലാത്തവര്‍

15. ബയോഡേറ്റയെ ആര്‍ക്കാണ് പേടി 

16. വിദ്യാധനവും വിദേശത്തെ പഠനവും

17. തോറ്റ എന്‍ജിനീയര്‍മാരുടെ ഭാവി

18. വിദേശജീവിതവും രണ്ടാമത്തെ പാസ്‌പോര്‍ട്ടും

19. കണ്‍സള്‍ട്ടന്റാകാം, നാട്ടിലിരുന്ന് ഡോളര്‍ വാങ്ങാം

20. തൊഴില്‍ കമ്പോളത്തിലെ രണ്ടാമൂഴം

21. രാഷ്ട്രീയം ഒരു നല്ല തൊഴിലാണോ?