TopGear1
TopGear2
ബ്രാണ്ട് വാല്യു; ഹ്യുണ്ടായ് പറപറക്കുന്നു
Posted on: 10 Oct 2012
വിത്സണ്‍ വര്‍ഗ്ഗീസ്

ലോകത്തെ നൂറ് പ്രമുഖ ബ്രാണ്ടുകളില്‍ അമ്പത്തിമൂന്നാംസ്ഥാനത്തേയ്ക്ക് സ്വന്തം മൂല്യമുയര്‍ത്തി ഹ്യുണ്ടായ് മോട്ടോര്‍ കമ്പനി എതിരാളികളെ അമ്പരപ്പിക്കുന്നു. കമ്പനികളുടെ സാമ്പത്തികനിലയും വിപണിയിലെ നൂതന പരിഷ്‌കാരങ്ങളും പ്രതികരണങ്ങളുമടക്കം പഠന വിധേയമാക്കി ബ്രാണ്ട് വാല്യു നിര്‍ണ്ണയിക്കുന്ന ആഗോള ബ്രാണ്ട് കണ്‍സള്‍ട്ടന്റായ ഇന്റര്‍ ബ്രാണ്ട് ആണ് പുതിയ റിപ്പോര്‍ട്ടില്‍ ഹ്യുണ്ടായിയുടെ മൂല്യം 24.4 ശതമാനം ഉയര്‍ന്നതായി കണ്ടെത്തിയത്.

എട്ടുവര്‍ഷമായി ഈ ലിസ്റ്റില്‍ തുടരുന്ന കൊറിയന്‍ താരം ഇക്കുറി സ്ഥാനം 84-ല്‍ നിന്നും 53-ലേക്കുയര്‍ത്തി എന്നതാണ് ആഗോള ബ്രാണ്ടുകള്‍ക്ക് നെഞ്ചിടിപ്പുയര്‍ത്തിയത്. ലിസ്റ്റിലുള്ള 100 സ്ഥാപനങ്ങളുടെ ബ്രാണ്ട് മൂല്യത്തില്‍ ശരാശരി വളര്‍ച്ച ഈ കാലയളവില്‍ 11.2 ശതമാനം മാത്രമാണെന്നോര്‍ക്കണം. ഓട്ടോമൊബൈല്‍ കമ്പനി എന്നുള്ളതില്‍ കവിഞ്ഞ് ലോകത്തെ ഏറ്റവും മികച്ച ബ്രാണ്ടുകളിലൊന്ന് എന്ന നിലയിലേക്ക് ഹ്യുണ്ടായ് അതിവേഗം വളരുകയാണെന്നാണ് ഇന്റര്‍ ബ്രാണ്ട്‌സ് പറയുന്നത്. ആപ്പിളും ഗൂഗിളും പോലെ ആമസോണ്‍ ഡോട്ട് കോം പോലെ.



ടൊയോട്ടയുടെ ബ്രാണ്ട് മൂല്യത്തില്‍ ഒന്‍പത് ശതമാനം മാത്രമാണ് വളര്‍ച്ച. ബ്രാണ്ട് എന്ന നിലയ്ക്ക് ഹോണ്ടയ്ക്ക് വളര്‍ച്ചാ ശതമാനം നെഗറ്റീവ് ആണ്. നിസ്സാന്‍ പക്ഷേ, 30 ശതമാനം വാല്യു ഉയര്‍ത്തി. പക്ഷേ, ലിസ്റ്റില്‍ റാങ്ക് 73 ആണ്. പോര്‍ഷെ 12 ശതമാനം ബ്രാണ്ട് വാല്യു ഉയര്‍ത്തിയെങ്കിലും 72-ാം സ്ഥാനത്ത് നില്‍ക്കുന്നു. 55-ാം സ്ഥാനത്തുള്ള ഓഡിയുടെ ബ്രാണ്ട് മൂല്യം 17 ശതമാനം വര്‍ധന കാണിക്കുന്നു.

യൂറോ -2012 അടക്കമുള്ള ചാമ്പ്യന്‍ഷിപ്പുകള്‍ സ്‌പോണ്‍സര്‍ ചെയ്യുക വഴി ബ്രാണ്ടിന് യൂറോപ്പില്‍ വന്‍ ജന പ്രീതിയുണ്ടായി എന്നാണ് അവിടുത്തെ ഹ്യൂണ്ടായ് മാര്‍ക്കറ്റിങ്ങ് ഡയറക്ടര്‍ മാര്‍ക്ക് ഹാള്‍ പറയുന്നത്. ഇനിയും ഇത്തരത്തില്‍ മുന്നോട്ട് പോകുമെന്ന് അദ്ദേഹം ആത്മവിശ്വാസം പ്രകടിപ്പിക്കുകയും ചെയ്യുന്നു. എതിരാളികള്‍ക്ക് ഹ്യുണ്ടായ് വളരുന്ന ആശങ്കയാണെന്നാണ് ഇന്റര്‍ ബ്രാണ്ട്‌സ് അതിന്റെ വെബ്‌സൈറ്റില്‍ പ്രതികരിച്ചതിങ്ങനെയാണ്.



1967 -ലാണ് സൗത്ത് കൊറിയന്‍ കമ്പനിയായ ഹ്യൂണ്ടായ് മോട്ടോര്‍ ഗ്രൂപ്പ് ആരംഭിക്കുന്നത്. ഇപ്പോള്‍ സൗത്ത് കൊറിയയ്ക്ക് വെളിയില്‍ ആറ് നിര്‍മ്മാണ മേഖലകളുണ്ട്. 2011-ല്‍ മാത്രം 40 ലക്ഷത്തിലധികം വാഹനങ്ങള്‍ ആഗോളതലത്തില്‍ വിറ്റഴിച്ചു. 80000 പേര്‍ ജോലി ചെയ്യുന്ന കമ്പനി ചെറുതും വലുതുമായ യാത്രാ വാഹനങ്ങള്‍ എസ്.യു.വി വാണിജ്യ വാഹനങ്ങള്‍ എന്നിവയുടെ നിര്‍മ്മാതാക്കളാണ്. 1977 - ല്‍ യൂറോപ്പിലെത്തി. 2011-ല്‍ 50 ലക്ഷം കാര്‍ എന്ന നിലയിലേക്ക് വില്‍പ്പന വര്‍ദ്ധിപ്പിച്ചു. ഐ 30 യാണ് 28 യൂറോപ്യന്‍ രാജ്യങ്ങളില്‍ സ്വാധീനമുള്ള ഹ്യുണ്ടായിയുടെ യൂറോപ്യന്‍ തുറുപ്പുചീട്ട്.



ഹ്യുണ്ടായ്ക്ക് പിന്നാലെ കൊറിയയിലെ കിയയും ഇത്തവണ ലോകത്തെ മികച്ച നൂറ് ബ്രാണ്ടുകളുടെ പട്ടികയില്‍ ഇടംനേടിയിട്ടുണ്ട്. 87 ാം സ്ഥാനമാണ് കിയയ്ക്ക്. ലോകത്തില്‍ ഏറ്റവും വേഗത്തില്‍ വളരുന്ന ബ്രാണ്ടെന്ന വിശേഷണമാണ് കിയയ്ക്കുള്ളത്. 2008 മുതല്‍ 11 വരെയുള്ള കാലയളവിലെ വില്‍പ്പനയില്‍ 81 ശതമാനം വളര്‍ച്ചയാണ് കിയ കൈവരിച്ചത്. കൊറിയന്‍ വിപണിയില്‍ രണ്ടാം സ്ഥാനമുള്ള വാഹന നിര്‍മ്മാതാക്കളായ കിയ. ഹ്യുണ്ടായ്ക്കാണ് അവിടെ ഒന്നാംസ്ഥാനം. ഭാഗികമായി ഹ്യുണ്ടായ് ഉടമസ്ഥതയിലുള്ള ബ്രാണ്ടാണ് കിയ.


Print
SocialTwist Tell-a-Friend




Other stories in this section