TopGear1
മഹീന്ദ്ര ക്വാണ്ടോ
Posted on: 20 Sep 2012



മുംബൈ: ഹാച്ച്ബാക്ക് കാറിന്റെ സൗന്ദര്യവുമായി മഹീന്ദ്രയുടെ ചെറു സ്‌പോര്‍ട് യൂട്ടിലിറ്റി വാഹനം ക്വാണ്ടോ വിപണിയിലെത്തി. 5.82 ലക്ഷം മുതല്‍ 7.36 ലക്ഷം വരെയാണ് ഏഴു സീറ്റുള്ള ഡീസല്‍ വാഹനത്തിന്റെ വില. സി 2, സി 4, സി 6, സി 8 എന്നീ നാല് വേരിയന്റുകളില്‍ ലഭിക്കും. വലിയ ഡീസല്‍ ഹാച്ച്ബാക്കുകളും എന്‍ട്രി ലെവല്‍ സെഡാനുകളും വാങ്ങുന്നവരെ ലക്ഷ്യമാക്കിയാണ് മിനി സൈലോ എന്ന് വിശേഷിപ്പിക്കാവുന്ന ക്വാണ്ടോ എത്തുന്നത്.

സ്‌കോര്‍പിയോയ്ക്ക് കരുത്ത് പകരുന്ന എംഹോക്ക് എന്‍ജിന്റെ നവീകരിച്ച പതിപ്പായ എം.സി.ആര്‍ 100 ആണ് ക്വാണ്ടോയിലുള്ളത്. 1493 സി.സി എന്‍ജിന്‍ 98.6 ബി.എച്ച്.പി പരമാവധി കരുത്തും 24.4 കെ.ജി.എം പരമാവധി ടോര്‍ക്കും നല്‍കും. അഞ്ചു സ്പീഡാണ് ഗിയര്‍ബോക്‌സ്. കൂടുതല്‍ കരുത്തുള്ള നാലുസിലിണ്ടര്‍ എന്‍ജിനും ഫോര്‍വീല്‍ ഡ്രൈവ് സംവിധാനവുമുള്ള ക്വാണ്ടോ വൈകാതെ വിപണിയിലെത്തും.

അലോയ് വീലുകള്‍, പവര്‍ വിന്‍ഡോസ്, ഡീസല്‍ ഡ്രൈവര്‍ അസിസ്റ്റ് സംവിധാനം, ഉയരം ക്രമീകരിക്കാവുന്ന ഡ്രൈവര്‍സീറ്റ്, ബോഡി കളറുള്ള ബമ്പറുകള്‍, ഇലക്ട്രിക് വിങ് മിററുകള്‍, ഓഡിയോ സിസ്റ്റം, റിയര്‍ ഡീഫോഗര്‍, എ.ബി.എസ്, ഡ്രൈവര്‍- പാസഞ്ചര്‍ എയര്‍ബാഗുകള്‍, ഫോഗ് ലാമ്പുകള്‍, റിവേഴ്‌സ് പാര്‍ക്കിങ് സെന്‍സര്‍ തുടങ്ങിയ ആഡംബര വാഹനങ്ങളിലെ സൗകര്യങ്ങളെല്ലാം ഉയര്‍ന്ന വേരിയന്റായ സി 8 ല്‍ ലഭിക്കും. അലോയ് വീലുകള്‍, പാര്‍ക്കിങ് സെന്‍സര്‍, എയര്‍ബാഗുകള്‍ എന്നിവ ഒഴികെയുള്ള സൗകര്യങ്ങള്‍ സി 6 വേരിയന്റിലുണ്ട്. മഹീന്ദ്രയുടെ മൈക്രോ ഹൈബ്രിഡ് സാങ്കേതികവിദ്യയുടെ പിന്തുണ ഏറ്റവും വിലകുറഞ്ഞ വേരിയന്റായ സി 2 ഒഴികെയുള്ളവയ്ക്ക് ഉണ്ട്.



രജ്യത്തെ 200 ഡീലര്‍ഷിപ്പുകള്‍വഴി ക്വാണ്ടോ ലഭിക്കും. 100 കോടിയുടെ നിക്ഷേപമാണ് ചെറു എസ്.യു.വി വികസിപ്പിക്കാന്‍ മഹീന്ദ്ര നടത്തിയത്. സൈലോ വാഹനങ്ങള്‍ നിര്‍മ്മിക്കുന്ന പ്ലാന്റില്‍നിന്ന് തന്നെയാവും ക്വാണ്ടോയും പുറത്തിറങ്ങുക. യൂറോപ്പ്, ദക്ഷിണാഫ്രിക്ക, ചിലി വിപണികളിലേക്ക് ക്വാണ്ടോ കയറ്റുമതി ചെയ്യാനുള്ള സാധ്യത മഹീന്ദ്ര ആരായുന്നുണ്ട്.
Print
SocialTwist Tell-a-Friend




Other stories in this section