TopGear1
TopGear2
കളിയല്ല അഭിനാഷിന് കളിവണ്ടികള്‍
Posted on: 17 Jul 2012
ടി.വി.വിനോദ്‌



വീട്ടില്‍ നിന്നിറങ്ങി റോഡിലെത്തിയാല്‍ അഭിനാഷിന്റെ നോട്ടം മുഴുവന്‍ ചീറിപ്പായുന്ന വാഹനങ്ങളിലായിരിക്കും. മറ്റുള്ളവര്‍ കാണുന്നതുപോലെ വെറുമൊരു നോട്ടമല്ലത്. മറിച്ച് അവയുടെ പുത്തന്‍ മോഡലും ഭംഗിയും അഭിനാഷ് മനസ്സില്‍ കുറിച്ചെടുക്കുകയാണ്. ദിവസങ്ങള്‍ കഴിഞ്ഞ് വീട്ടിലെത്തുന്നവര്‍ക്ക് റോഡില്‍ ചീറിപ്പാഞ്ഞ വാഹനത്തെ അഭിനാഷ് കാട്ടിക്കൊടുക്കും. രൂപത്തില്‍ ഒറിജിനലിനെ വെല്ലുന്നവയാണത്. ഇത്തരത്തില്‍ കുറേ ബസ്സും കാറും ഓട്ടോറിക്ഷയും ലോറിയുമുള്‍പ്പെടെയുള്ളവ നിര്‍മിച്ച് കളിയല്ല കളിവണ്ടി നിര്‍മാണമെന്ന് കാട്ടിക്കൊടുക്കുകയാണ് കൂത്തുപറമ്പ് മൂര്യാട് സ്വദേശിയായ ഈ ഇരുപത്തിമൂന്നുകാരന്‍.

നിര്‍മിക്കുന്നത് കളിവണ്ടിയാണെങ്കിലും തികഞ്ഞ സൂക്ഷ്മതയോടെയാണ് അഭിനാഷിന്റെ പ്രവൃത്തി. രണ്ടരയടി നീളവും ഒരടി വീതിയുമാണ് അഭിനാഷിന്റെ ബസ്സിന്റെ വലിപ്പം. നിശ്ചിത അളവെടുത്ത് ഷാസി നിര്‍മിക്കലാണ് ആദ്യഘട്ടം. തുടര്‍ന്ന് മരക്കഷ്ണങ്ങള്‍ ഉപയോഗിച്ച് നാലുഭാഗങ്ങളും ആണിയടിച്ച് ഉറപ്പിക്കും. ഫൈബറുകള്‍ ഉപയോഗിച്ചുള്ള സീറ്റുകളും സ്‌ട്രോകളുപയോഗിച്ച് നിര്‍മിച്ച തൂണുകളും ബസ്സിന് ഉണ്ടാകും. ഉള്‍ഭാഗങ്ങളിലെ വെളിച്ചത്തിന് എല്‍.ഇ.ഡി.ലൈറ്റ് ഫിറ്റ് ചെയ്യും. വാഹനത്തിന് ഐശ്വര്യം പകരാന്‍ ദൈവങ്ങളുടെ ഫോട്ടോകള്‍ ഡ്രൈവറുടെ സീറ്റിനുമുന്നിലായി അലങ്കരിച്ചു വെക്കും. പിന്നീട് ബസ്സിന്റെ മേല്‍ഭാഗം ഇരുമ്പുതകിട് ഉപയോഗിച്ച് നന്നായി ഉറപ്പിച്ചുകഴിഞ്ഞാല്‍ നിര്‍മാണം ഏകദേശം പൂര്‍ത്തിയായെന്ന് പറയാം.

ഗ്ലാസ് നീക്കാനും വായു കളയാനുമുള്ള സൗകര്യവുമുണ്ട്. ബസിന് അനുയോജ്യമായ നിറങ്ങള്‍ തിരഞ്ഞെടുത്ത് മനോഹരമായി അവ പെയിന്റ് ചെയ്തതിനുശേഷം നല്ലൊരു പേരും കൂടി എഴുതി കഴിഞ്ഞാല്‍ അഭിനാഷിന്റെ സ്വന്തം ബസ് റെഡി. ഇതിന് സമാനമായ രീതിയില്‍ തന്നെയാണ് ലോറിയും കാറും ഓട്ടോറിഷയും അഭിനാഷ് നിര്‍മിക്കുന്നത്.എന്തിനാണ് ഇത്രമാത്രം കളിവണ്ടികള്‍ നിര്‍മിച്ച് പണവും സമയവും നഷ്ടമാക്കുന്നതെന്ന ചോദ്യത്തിന് അഭിനാഷിന് വ്യക്തമായ മറുപടിയുണ്ട്. ആഗ്രഹിച്ച് നടന്ന കുട്ടിക്കാലത്ത് കളിവണ്ടികള്‍ എനിക്ക് ലഭിച്ചിരുന്നില്ല. വളര്‍ന്നപ്പോള്‍ നഷ്ടമായ ആ കളിവണ്ടികള്‍ സ്വയം നിര്‍മിച്ച് ഞാന്‍ സന്തോഷിക്കുന്നു. നിര്‍മിച്ച കളിവണ്ടികള്‍ വീട്ടിനുള്ളില്‍ അമൂല്യനിധി പോലെ അഭിനാഷ് സൂക്ഷിക്കുമ്പോള്‍ ചോദ്യത്തിനുള്ള ഉത്തരം പൂര്‍ണമാണ്. പെയിന്റിങ്ങാണ് അഭിനാഷിന്റെ ജോലി. അരവിന്ദാഷന്‍-സവിത ദമ്പതിമാരുടെ മകനാണ്. അഖില്‍ സഹോദരനാണ്.
Print
SocialTwist Tell-a-Friend









Other stories in this section