TopGear1
TopGear2
ടൊയോട്ടയുടെ 'മിസ്റ്റര്‍ പ്രയസ്'
Posted on: 14 Jul 2012
ജാഫര്‍ എസ്. പുല്‍പ്പള്ളി



രണ്ടാം ലോകമഹായുദ്ധം അവസാനിക്കാന്‍ മാസങ്ങള്‍ മാത്രമുള്ള സമയത്ത് ജപ്പാന്‍ സ്വന്തമായി ഒരു ജെറ്റ് യുദ്ധവിമാനം നിര്‍മിക്കാന്‍ ശ്രമിച്ചു. യുദ്ധത്തില്‍ കൂട്ടാളിയായ ജര്‍മനി അവരുടെ ജെറ്റ് ഫൈറ്ററിന്റെ ബ്ലൂപ്രിന്റുകള്‍ നല്‍കാന്‍ സമ്മതിച്ചതിനെ തുടര്‍ന്നായിരുന്നു അത്. പക്ഷേ ബെര്‍ലിനില്‍ നിന്നുള്ള ഡിസൈന്‍ ചിത്രങ്ങളും രേഖകളുമായി പുറപ്പെട്ട മുങ്ങിക്കപ്പല്‍ വഴിയില്‍ ശത്രുക്കളുടെ പിടിയിലായി. എന്നാല്‍ ആ നഷ്ടം ജപ്പാനെ തളര്‍ത്തിയില്ല. ജര്‍മന്‍ വിമാനത്തിന്റെ ഫോട്ടോകളെ മാത്രം ആശ്രയിച്ച ജപ്പാനീസ് എഞ്ചിനീയറിങ്ങ് മിടുക്കന്മാര്‍ ജെറ്റിന്റെ നിര്‍മാണം ആരംഭിച്ചു. എല്ലാം തികഞ്ഞതല്ലെങ്കിലും അവര്‍ ഫൈറ്റര്‍ ജെറ്റ് നിര്‍മിച്ചു. അത് ഒരു തവണ പറക്കുകയും ചെയ്തു. ജപ്പാന്റെ കീഴടങ്ങലിനു വെറും ഒരാഴ്ച മാത്രം മുന്‍പായിരുന്നു അത്.

ലോകത്തിലെ ഏറ്റവും വലിയ കാര്‍ കമ്പനിയായ ടൊയോട്ടയുടെ എക്‌സിക്യൂട്ടീവ് വൈസ് ചെയര്‍മാന്‍ ആയി ഈ മാസം നിയമിതനായ തകേഷി ഉചിയമാഡയാണ് തനിക്ക് എന്നും പ്രചോദനം തന്ന ആ സംഭവത്തെക്കുറിച്ച് സഹപ്രവര്‍ത്തകരോട് പറയാറ്. 'ശൂന്യതയില്‍ നിന്നുള്ള സ്യഷ്ടി!' എന്നതാണ് ഈ കഥയുടെ കാമ്പ്. ഉചിയമാഡയുടെ 43 വര്‍ഷം നീണ്ട പ്രൊഫഷണല്‍ ജീവിതത്തിന്റെയും രത്‌നച്ചുരുക്കമാണത്.

പ്രതിഭാശാലിയായ തുടക്കക്കാരന്‍


ടൊയോട്ടയുടെ ആസ്ഥാനമായ ടൊയോട്ട സിറ്റിയില്‍ നിന്ന് വളരെ ദൂരെയല്ല ഉചിയമാഡയുടെ ജന്മദേശമായ ഒകാസാക്കി. ഒരു മികച്ച കാര്‍ നിര്‍മ്മാതാവാകുക എന്ന ബാല്യകാല സ്വപ്നത്തിന്റെ പ്രധാന പ്രചോദനം ടൊയോട്ട ഇതിഹാസമായിരുന്ന പിതാവ് തന്നെ. ടൊയോട്ടയുടെ കിരീടത്തിലെ എക്കാലത്തെയും പൊന്‍തൂവല്‍ ആയ ക്രൗണ്‍ എന്ന സെഡാന്റെ ശില്പി ആയിരുന്നു പിതാവ്. പക്ഷേ, അച്ഛന്‍ ഇതിഹാസമായിരുന്നെങ്കിലും മകന്‍ താഴെ തട്ടിലെ ജോലികളുമായിട്ടാണ് ജീവിതം തുടങ്ങിയത്. കാറുകളുടെ ശബ്ദം, വൈബ്രേഷന്‍ എന്നിവ പരിശോധിക്കുന്ന വിഭാഗത്തിലായിരുന്നു ആദ്യം ജോലി. അങ്ങനെ വര്‍ണരഹിതമായ ജീവിതം നയിക്കുമ്പോഴാണ് 1994-ല്‍ താകേഷിയെ തേടി ഉത്തരവ് വന്നത്.

പുതിയ മോഡല്‍ പ്രയസിന്റെ നിര്‍മ്മാണച്ചുമതല ഏറ്റെടുക്കുക!

താന്‍ ഒരിക്കലും ഒരു ചീഫ് എഞ്ചിനീയര്‍ ആയിരുന്നില്ല എന്ന ഉചിയമാഡയുടെ വാക്കുകള്‍ക്കുള്ള മറുപടി 'അതു കൊണ്ടു തന്നെയാണ് തന്നെ തിരഞ്ഞെടുത്തത്' എന്നായിരുന്നു. 'ഇരുപത്തൊന്നാം നൂറ്റാണ്ടിലേക്കായൊരു കാര്‍ നിര്‍മ്മിക്കുക' എന്നതായിരുന്നു അദ്ദേഹത്തിനു കിട്ടിയ നിര്‍ദ്ദേശം.

പ്രയസ് എന്ന കളരി


നിലവില്‍ വിപണിയിലുണ്ടായിരുന്ന സമാന വലുപ്പമുള്ള കാറുകളേക്കാള്‍ 50 ശതമാനം ഇന്ധനക്ഷമതയുള്ള ഒരു കാറിന്റെ രൂപരേഖയുമായി താകേഷി മേലാന്മാളെ സമീപിച്ചപ്പോള്‍ അവര്‍ മുരണ്ടു: മാര്‍ക്കറ്റിലുള്ളതിനേക്കാളും ഇരട്ടി മെച്ചപ്പെട്ടതാണ് നമുക്ക് വേണ്ടത്.
തുടര്‍ന്ന് ടൊയോട്ട കണ്ടത് ഉചിയമാഡയുടെ തനതായ നിര്‍മ്മാണകലയായ, പിന്നീട് ലോകമെമ്പാടും പ്രശസ്തിയാര്‍ജ്ജിച്ച 'കൈസന്‍' ആണ്. അത് തുടര്‍ച്ചയായ കണ്ടുപിടുത്തത്തിന്റെയും മെച്ചപ്പെടുത്തലിന്റെയും കലയാണ്. ഉചിയമാഡ എന്ന പുനര്‍ചിന്തകന്‍ അവിടെ ജനിക്കുകയായിരുന്നു.'പുനര്‍ചിന്ത' എന്ന ഉപകരണം ഇല്ലായിരുന്നുവെങ്കില്‍ ഏറ്റവും കുറഞ്ഞ സമയം കൊണ്ട് അദ്ദേഹത്തിനു തികച്ചും പുതിയ കാര്‍ നിര്‍മ്മിക്കാനാകില്ലായിരുന്നു. ഇലക്ട്രിക്ക് കാറുകളും ഹൈബ്രിഡുകളുമൊന്നും ആരും ഗൗരവമായി കാണാത്ത കാലത്ത് ടൊയോട്ടയുടെ വിപണി ചരിത്രം തന്നെ മാറ്റി മറിച്ച ഹൈബ്രിഡ് കാറായി പ്രയസ് പിറന്നു വീണത് അങ്ങനെയാണ്.

പുത്തന്‍ രീതികളുടെ ഉദ്ഘാടകന്‍



പദ്ധതിയില്‍ ഉള്‍പ്പെട്ട മുഴുവന്‍ എന്‍ഞ്ചിനീയര്‍മാരെയും ഒരു വലിയ മുറിയില്‍ ഒന്നിച്ചിരുത്തി ആശയങ്ങളും ചിന്തകളും പരസ്പരം പറയുകയും ആ പങ്കുവെക്കലുകളില്‍ നിന്നു തന്നെ അന്തിമ ആശയം ഉരുത്തിരിയിക്കുകയും ചെയ്യുന്ന ' ഒബെയ ' എന്ന പുത്തന്‍ രീതിയും ഉചിയമാഡ 'പ്രയസ് ' പദ്ധതിയില്‍ ആവിഷ്‌കരിച്ചു . തുടര്‍ന്ന് ഈ രീതി തന്നെ തുടര്‍ന്നങ്ങോട്ട് പിന്തുടരാന്‍ മേധാവികളെ പ്രേരിപ്പിക്കുമാറ് അത് മികച്ച ഫലങ്ങള്‍ ഉളവാക്കി പ്രയസിന്റെ നിര്‍മ്മാണവേളയില്‍. ലോകത്തെമ്പാടുമുള്ള കമ്പനികള്‍ തങ്ങളുടെ ഉത്പന്നങ്ങളുടെ ഉത്ഭവ, വികസന ഘട്ടങ്ങളിലെല്ലാം ഈ ഒബെയ രീതി പകര്‍ത്തി എന്നത് പിന്നീടുള്ള ചരിത്രം.

പ്രയസ് അദ്ദേഹത്തിനും ടൊയോട്ട കമ്പനിക്കും നല്‍കിയത് വലിയ നേട്ടങ്ങളായിരുന്നു. പുറത്തിറങ്ങിയ ഉടന്‍ തന്നെ കാര്‍പ്രേമികളുടെ ഇഷ്ടനാമം ആയ പ്രയസ് അതിന്റെ നിര്‍മ്മാണത്തിനു പത്ത് വര്‍ഷത്തിനുള്ളില്‍ ഹൈബ്രിഡ് കാര്‍ എന്ന സങ്കല്പത്തിനു ഒരു പര്യായം ആയിത്തീരുകയും ചെയ്തു. ഉചിയമാഡ തുടങ്ങിവെച്ച ഒറിജിനല്‍ മോഡല്‍ ഇന്ന് മൂന്നാം തലമുറയിലെത്തി നില്‍ക്കുമ്പോള്‍ ടൊയോട്ടയ്ക്ക് ഏറ്റവും വരുമാനം നല്‍കുന്ന കാറുകളുടെ കൂട്ടത്തിലാണിന്ന് പ്രയസ്. ഉചിയമാഡയ്ക്ക് ഉചിതമായ ഒരു വിളിപ്പേരും ആ കാര്‍ സമ്മാനിച്ചു : മിസ്റ്റര്‍ പ്രയസ്.

തിരിഞ്ഞു നോക്കാതെ മുന്നോട്ട്


പിന്നെ ലോകം കണ്ടത് ടൊയോട്ടയില്‍ 'ഉചിയമാഡയുടെത്' എന്നു പറയാവുന്ന യുഗമാണ്. പടിപടിയായി തന്റെ കരിയറില്‍ നേട്ടങ്ങള്‍ കൊയ്ത അദ്ദേഹം നടത്തിയ ചിട്ടയായ പ്രവര്‍ത്തനങ്ങളുടെ ഫലമായി എവിടെയും അദ്ദേഹം പ്രതീക്ഷകള്‍ക്കപ്പുറം കടന്നു ചെന്നു: ജപ്പാനിലെ ഒന്നാമനായ ടൊയോട്ടയെ ലോകത്തിലെ ഒന്നാം നമ്പര്‍ കാര്‍ നിര്‍മ്മാതാവാക്കി മാറ്റി, ടൊയോട്ടയുടെ ചരിത്രത്തിലെ ഏറ്റവും കടുത്ത പരീക്ഷണ കാലമായ ആഗോളസാമ്പത്തികമാന്ദ്യവും സുനാമിയും വരുത്തിത്തീര്‍ത്ത പ്രതിസന്ധിയുടെ ഘട്ടത്തില്‍ കമ്പനിയെ കൈപിടിച്ചുയര്‍ത്തുക എന്ന ഉദ്യമം ആയിരുന്നു 2008 ല്‍ ആഗോള ഉത്പാദനത്തിന്റെ ചുമതല വഹിക്കുന്ന വൈസ് പ്രസിഡണ്ട് എന്ന നിലയില്‍ അദ്ദേഹം ഏറ്റെടുത്തത്.



സാമ്പത്തിക മാന്ദ്യത്തില്‍ തുടങ്ങിയ പ്രതിസന്ധികള്‍ വിനാശകാരിയായ സുനാമിയില്‍ എത്തി നിന്നു. അവ ഒന്നിനു പുറകെ ഒന്നായി കടന്നു വരുമ്പോഴും ടൊയോട്ടയെ തിരിച്ചെത്തിക്കാന്‍ കഴിയും എന്ന ശുഭപ്രതീക്ഷ ഒരിക്കലും ഉചിയമാഡ കൈവിട്ടിരുന്നില്ല. ഇതിനായി നിര്‍മ്മാണ രീതിയില്‍ അദ്ദേഹം സമഗ്രമായ മാറ്റങ്ങള്‍ കൊണ്ടു വന്നു. ഗുണനിലവാര പരിശോധന എന്ന ഏറ്റവും പ്രധാന മേഖലയിലേക്ക് 100 മികച്ച എഞ്ചിനീയര്‍മാരെ പ്രത്യേകമായി നിയോഗിച്ചു. പൂര്‍ണത കൈവരിക്കാനായി പുതിയ മോഡലുകളുടെ പൂര്‍ത്തിയാക്കലിനു നാല് ആഴ്ച സമയം നീട്ടി നല്‍കി. എഞ്ചിനീയറി ങ്ങ് ടീമിലേക്ക് കൂടുതല്‍ അമേരിക്കന്‍ ചീഫ് എഞ്ചിനീയര്‍മാരെ നിയമിച്ചു. പ്രശ്‌നങ്ങള്‍ ഉണ്ടാകുന്ന ഉടന്‍ തന്നെ കണ്ടെത്തി പരിഹരിക്കാന്‍ ദ്രുതകര്‍മ്മ സംഘങ്ങളെയും നിയോഗിച്ചു. ടൊയോട്ട സിറ്റിയിലെ പ്രധാന ഉത്പാദനകേന്ദ്രവും ലോകമെമ്പാടും ഉള്ള മറ്റ് കേന്ദ്രങ്ങളും തമ്മിലുള്ള ബന്ധവും വിനിമയവും കൂടുതല്‍
ശക്തവും ഫലപ്രദവുമാക്കി മാറ്റി.

പ്രതിസന്ധി ആരംഭിച്ച് രണ്ട് വര്‍ഷത്തിനു ശേഷം ടൊയോട്ട ഒരിക്കല്‍ നഷ്ടപ്പെട്ട ലോകജേതാവിന്റെ കിരീടം വീണ്ടുമണിഞ്ഞു. പിന്നെയും ടൊയോട്ട യുഗവും 'ടൊയോട്ട രീതി'യും മടങ്ങിവന്നു. ടൊയോട്ടയുടെ വൈസ് ചെയര്‍മാന്‍ എന്ന ഉത്തുംഗസ്ഥാനത്തെത്തി നില്‍ക്കുന്ന ഈ മാനേജ്‌മെന്റ് ഗുരു തന്റെ പുത്തന്‍ പദ്ധതികളുടെ സൂചനകള്‍ നല്‍കിക്കഴിഞ്ഞു. ടൊയോട്ട ന്യൂ ഗ്ലോബല്‍ ആര്‍ക്കിട്ടെക്ചര്‍ എന്ന പുതിയ ഗവേഷണ, ഉത്പാദന രീതിയാണ് ഉചിയമാഡ ആവിഷ്‌കരിക്കാന്‍ ഉദ്ദേശിക്കുന്നത്, അദ്ദേഹം ഓട്ടൊമോട്ടീവ് ന്യൂസ് യൂറോപ്പിനോട് പറഞ്ഞു. പണ്ട് പ്രയസിന്റെ കളരിയില്‍ 'ഒബെയ' എന്ന പുത്തന്‍ രീതി പരീക്ഷിച്ച സമയത്തെ അതെ ഊര്‍ജ്ജം തന്നെ ഇന്നും അദ്ദേഹം പ്രസരിപ്പിക്കുന്നു .

Print
SocialTwist Tell-a-Friend










Other stories in this section