TopGear1
നാവിസ്റ്റാറില്‍ കണ്ണുവെച്ച് ഫിയറ്റും ഫോക്‌സ്‌വാഗണും
Posted on: 02 Jul 2012
വിത്സണ്‍ വര്‍ഗീസ്‌




നഷ്ടത്തിലോടുന്ന അമേരിക്കന്‍ ട്രക്ക് നിര്‍മ്മാണക്കമ്പനിയായ നാവിസ്റ്റാറിനുവേണ്ടി ഫോക്‌സ്‌വാഗണും ഫിയറ്റും ശ്രമിക്കുന്നുവെന്ന വാര്‍ത്ത മഹീന്ദ്രയെ സമ്മര്‍ദ്ദത്തിലാക്കുന്നു. 2010 മുതല്‍ നാവിസ്റ്റാറുമായി സഹകരിച്ച് ഉന്നതശ്രേണിയിലുള്ള ട്രക്കുകള്‍ ഇന്ത്യന്‍ മാര്‍ക്കറ്റില്‍ മഹീന്ദ്ര ഇറക്കുന്നുണ്ട്. 2011 നാവിസ്റ്റാറിന്റെ വില്പന 13.95 ബില്യന്‍ ഡോളറായിരുന്നത് ഈ വര്‍ഷം 12.14 ആയി കുറഞ്ഞു.
ജര്‍മ്മന്‍ കമ്പനിയായ ഫോക്‌സ്‌വാഗനാണെങ്കില്‍ ഇപ്പോള്‍ തന്നെ എ.ജി.മാന്‍, സ്‌കാനിയ എന്നീ ബ്രാന്‍ഡുകളില്‍ വലിയ ട്രക്കുകള്‍ ഇന്ത്യന്‍ മാര്‍ക്കറ്റില്‍ ഇറക്കുന്നുണ്ട്.

ഏറ്റെടുക്കലിലൂടെ അമേരിക്കന്‍ ട്രക്ക് വിപണി കൈയടക്കുവാനാണ് ഫോക്‌സ്‌വാഗന്റെ ശ്രമം. ഇറ്റാലിയന്‍ കമ്പനിയായ ഫിയറ്റിന്റെയും ലക്ഷ്യം അമേരിക്കന്‍ മാര്‍ക്കറ്റ് തന്നെ. ഇവ്‌കോ എന്ന ബ്രാന്‍ഡില്‍ വാണിജ്യ വാഹനങ്ങളും ഫിയറ്റ് ഇപ്പോള്‍ വില്ക്കുന്നുണ്ട്. ഇന്ത്യയില്‍ ഇതുവരെ എത്താത്ത ഇവ്‌കോയുടെ പ്രധാന വിപണി യൂറോപ്പും സൗത്ത് അമേരിക്കയുമാണ്. ഇന്ത്യയിലെ ട്രക്ക് വിപണിക്ക് വേണ്ടി അനേകം പുതിയ മോഡലുകളും പദ്ധതികളും ലക്ഷ്യം വയ്ക്കുന്ന മഹീന്ദ്ര വാര്‍ത്തകളോട് പക്ഷെ, പ്രതികരിച്ചിട്ടില്ല.

ട്രക്ക് വിപണിയിലേക്ക് കോടികള്‍


മാറ്റത്തിന്റെ പാതയില്‍ ഓടിക്കൊണ്ടിരിക്കുന്ന ഇന്ത്യന്‍ ട്രക്ക് വിപണി പൂര്‍ണ്ണമായും പരിഷ്‌കരിക്കാന്‍ ഒരുങ്ങുകയാണ് കമ്പനികള്‍. കരിയും പുകയുമായി നിരത്തി നീങ്ങിയിരുന്ന കട്ടവണ്ടികളുടെ കാലം എണ്ണപ്പെട്ടുകഴിഞ്ഞു. ശക്തിയും ആകാരഭംഗിയും ഇന്ധനക്ഷമതയും ഒത്തിണങ്ങിയ വിദേശ ബ്രാന്‍ഡുകളോട് കിടപിടിക്കാന്‍ മാറ്റം അനിവാര്യമാണെന്ന് ഈ രംഗത്തെ ഇന്ത്യന്‍ കുത്തക കമ്പനികള്‍ വൈകിയെങ്കിലും തിരിച്ചറിയുന്നു. വിപണിയെ അടിമുടി മാറ്റാന്‍ കോടികളാണ് ഈ കമ്പനികള്‍ നീക്കി വെച്ചിരിക്കുന്നത്.

മുമ്പ് മാന്‍, സ്‌കാനിയ, നാവിസ്റ്റാര്‍, വോള്‍വോ, എ.എം.ഡബ്ല്യു എന്നീ വിദേശികള്‍ ഇവിടെയെത്തിയപ്പോള്‍ തുടങ്ങിയ പരിഷ്‌കാരം ഡെയിംലര്‍ പുറത്തിറക്കുന്ന ഭാരത് ബെന്‍സിന്റെ വരവോടെ ശക്തമാക്കാന്‍ ഒരുങ്ങുകയാണ് കമ്പനികള്‍. ഇന്ത്യന്‍ സമ്പദ് വ്യവസ്ഥയുടെ മാന്ദ്യം മുമ്പില്ലാത്തവിധം തെളിഞ്ഞു വരുന്ന സമയത്താണ് ഈ മത്സരമെന്നോര്‍ക്കണം. ഭാരത് ബെന്‍സിന് നന്ദി. അടുത്ത രണ്ട് വര്‍ഷത്തിനുള്ളില്‍ ഏതാണ്ട് 100 പുതിയ വേരിയന്റുകള്‍ ഇന്ത്യന്‍ മാര്‍ക്കറ്റില്‍ പുതിയതായി ഇറങ്ങും. ഇതിനായി വിവിധ കമ്പനികളുടെ ആകെ നിക്ഷേപം ഒരു ബില്യന്‍ ഡോളര്‍ ആണ്.

വാണിജ്യവാഹനങ്ങളുടെ ഇന്ത്യന്‍ കുത്തകയായ ടാറ്റയും, അശോക് ലെയ്‌ലാന്റും ബെന്‍സിന്റെ വരവോടെ കൂടുതല്‍ കുഴപ്പത്തിലായിരിക്കുന്നത്. അതുകൊണ്ടു തന്നെ പരിഷ്‌കരണത്തിന്റെ മുന്‍നിരയിലും അവരാണ്. 1500 മുതല്‍ 2000 കോടി വരെ നിക്ഷേപിക്കാനാണ് ടാറ്റയുടെ പദ്ധതി. 800 കോടിയുമായി ലെയ്‌ലാന്‍ഡുമുണ്ട് കൂടെ. വി.ജെ., കൊമേഴ്‌സ്യല്‍ വെഹിക്കിള്‍ 800-1000 കോടിയാണ് നിക്ഷേപിക്കുന്നത്. എ.എം.ഡബ്ല്യു(ഏഷ്യന്‍ മോട്ടോര്‍ വര്‍ക്‌സ്) 300-500 കോടി ഇന്ത്യന്‍ വിപണിക്ക് വേണ്ടി നീക്കിവെച്ചിട്ടുണ്ട്. നവിസ്റ്റാറിന്റെ വിഹിതം 100-250 കോടിയാണ്.

ടാറ്റയുടെ ശ്രദ്ധ 7-9 ടണ്‍ ട്രക്കുകളുടെ പരിഷ്‌കരണത്തിലാണ്. എന്‍ജിന്‍ പരിഷ്‌കരണത്തിലും അന്തര്‍ദേശീയ ട്രക്ക് റേഞ്ചായ എവിയ യിലുമാണ് ലെയ്‌ലാന്റ് ശ്രദ്ധിക്കുക. കല്‍ക്കരി, സിമന്റ്, ഭക്ഷ്യസംസ്‌കരണ വ്യവസായം എന്നീ മേഖലയ്ക്ക് വേണ്ടിയുള്ള രൂപകല്പനയിലായിരിക്കും മഹീന്ദ്ര നാവിസ്റ്റാര്‍ നിക്ഷേപം നടത്തുക.



ക്യാബിനുകള്‍ അടിമുടി പരിഷ്‌കരിക്കാനാണ് എ.എം.ഡബ്ല്യു ന്റെ തീരുമാനം. വി.ഇ.കൊമേഴ്‌സ്യല്‍ വെഹിക്കിളും (ഐഷര്‍) മാറ്റത്തിന്റെ മുന്‍നിരയിലുണ്ട്. ഉദ്പാദന രംഗത്ത് മാത്രമല്ല വിതരണമേഖലയും കാര്യക്ഷമമാക്കുമെന്ന് ലെയ്‌ലാന്റ് വ്യക്തമാക്കി കഴിഞ്ഞു.
ഭാരത് ബന്‍സിന്റെ വരവില്‍ ആശങ്കയിലായ ട്രക്ക് വിപണി മാര്‍ക്കറ്റിങ്ങിന്റെ പുത്തന്‍ തന്ത്രങ്ങളും പരിഷ്‌കരിക്കാന്‍ ഒരുങ്ങുന്നു. ഇതിനകം തന്നെ ഇന്ത്യയിലെ പ്രമുഖ ബ്രാന്‍ഡുകളെല്ലാം നാഷണല്‍ ചാനലുകളില്‍ പരസ്യങ്ങള്‍ ധാരാളമായി നല്‍കുന്നുണ്ട്. ഇക്കാര്യത്തില്‍ ടാറ്റയും മഹീന്ദ്രയും ലെയ്‌ലാന്റും മുന്‍പന്തിയിലാണ്.

ക്രിക്കറ്റ് താരം മഹേന്ദ്രസിംഗ് ധോനിയെ ബ്രാന്റ് അംബാസിഡറാക്കി ഒരുപടികൂടി കടന്നിരിക്കുകയാണ് ലെയ്‌ലാന്റ്, ടാറ്റയാകട്ടെ ഒരു പ്രമുഖഎന്റര്‍ടെയ്ന്‍മെന്റ് ചാനലില്‍ റിംഗ്-കാ-കിംഗ് എന്ന റെസ്‌ലിംഗ് ഷോ സ്‌പോണ്‍സര്‍ ചെയ്തിരിക്കുകയാണ്. ഇന്ത്യന്‍ ട്രക്ക് വിപണിയില്‍ ഏറ്റവും വലിയ പോരായ്മയായി അറിയപ്പെടുന്ന മികച്ച ഡ്രൈവര്‍മാരുടെ അഭാവം പരിഹരിക്കാനാണ് നാവിസ്റ്റാര്‍ മഹീന്ദ്രയുടെ ശ്രമം. ഇതിനായി ഇവര്‍ ട്രാന്‍സ്‌പോര്‍ട്ട് എക്‌സലന്‍സ് അവാര്‍ഡ് ഏര്‍പ്പെടുത്തിയിരിക്കുന്നു. ഇത്രയും കടുത്ത മത്സരം നിലനില്‍ക്കുമ്പോഴും മാന്ദ്യത്തിന്റെ കരിനിഴല്‍ ശ്രദ്ധിക്കാതെ ഇന്ത്യയിലേക്ക് വരാന്‍ കാത്തിരിക്കുകയാണ് ചൈനീസ് ട്രക്ക് നിര്‍മ്മാതാക്കളായ ബിക്കി-ഫോട്ടോണ്‍ എന്നതാണ് ഏറെ രസകരം. 1700 കോടി രൂപയാണ് ഇവരുടെ ഇന്ത്യന്‍ നിക്ഷേപം എങ്ങിനെ വരാതിരിക്കും. ആഗോള മാന്ദ്യം ലോകമാര്‍ക്കറ്റിലുണ്ടാക്കിയ പുലിവാല് ചില്ലറയല്ലല്ലോ?



Print
SocialTwist Tell-a-Friend




Other stories in this section