കൊല്‍ക്കത്ത: പെട്രോള്‍-ഡീസല്‍ വാഹനങ്ങള്‍ വഴിയുണ്ടാകുന്ന അന്തരീക്ഷ മലിനീകരണം അനുദിനം വര്‍ധിക്കുന്ന സാഹചര്യത്തില്‍ മലിനീകരണ തോത് കുറയ്ക്കാന്‍ 'ബയോഗ്യാസ്' ബദല്‍ മാര്‍ഗ്ഗവുമായി ഫൊണിക്‌സ് ഇന്ത്യ റിസര്‍ച്ച് ഡെവലപ്പ്‌മെന്റ് ഗ്രൂപ്പ്. ചാണക ബയോഗ്യാസ് ഇന്ധമാക്കി 55 പേര്‍ക്ക് സഞ്ചരിക്കാവുന്ന ബസ് പുറത്തിറക്കിയാണ് ഇന്ത്യയില്‍ ഇവര്‍ പുതിയ ചരിത്രത്തിന് തുടക്കംകുറിച്ചത്. ഇത്തരത്തില്‍ പുറത്തിറങ്ങുന്ന രാജ്യത്തെ ആദ്യ ബസാണിത്. ഓരോ യാത്രക്കാര്‍ക്കും വെറും ഒരു രൂപയ്ക്ക് ഈ ബസില്‍ യാത്ര ചെയ്യാമെന്നതാണ് പ്രധാന സവിശേഷത, നിലവില്‍ 12-17 കിലോമീറ്ററിന് 6 രൂപയാണ് സംസ്ഥാനത്തെ മറ്റു ബസുകളിലെ മിനിമം നിരക്ക്.

കേന്ദ്ര പാരമ്പര്യേത ഊര്‍ജ വകുപ്പിന്റെ സെന്‍ട്രല്‍ സബ്‌സിഡി പദ്ധതിയുടെ ഭാഗമായാണ് ബയോഗ്യാസ് ബസ് നിര്‍മാണം പൂര്‍ത്തിയാക്കിയത്. ഒരു കിലോഗ്രാം ബയോഗ്യാസില്‍ ആറ് കിലോമീറ്റര്‍ ദൂരം പിന്നിടാന്‍ ഇവന് സാധിക്കും. പരമാവധി 20 രൂപ ചെലവില്‍ ഒരു കിലോ ബയോഗ്യാസ് ഉല്‍പ്പാദിപ്പിക്കാന്‍ കഴിയും. 80 കിലോഗ്രാം ബയോഗ്യാസ്‌ വരെ ഇന്ധനടാങ്കില്‍ സംഭരിക്കാം, അതായത് ഫുള്‍ടാങ്ക് ബയോഗ്യാസില്‍ 480 കിലോമീറ്റര്‍ യാത്ര ചെയ്യാം. വാണിജ്യ വാഹന നിര്‍മാണത്തില്‍ മുന്‍നിരയിലുള്ള അശോക് ലെയ്‌ലാന്റാണ് നിര്‍മിച്ച ബസിലാണ് ബയോഗ്യാസ് പരീക്ഷണം നടത്തിയത്.

കൊല്‍ത്തയിലെ അള്‍ട്ടഡങ്ക-ഗരിയ റൂട്ടില്‍ 17.5 കിലോമീറ്റര്‍ ഓടിച്ചാണ് ബയോഗ്യാസ് ബസിന്റെ ആദ്യ സര്‍വ്വീസ് ആരംഭിച്ചത്‌. സംഗതി ബയോഗ്യാസ് ആണെങ്കിലും ജര്‍മന്‍ ടെക്‌നോളജി എഞ്ചിനാണ് ബസിന് കരുത്തേകുന്നത്. ചാണക ബയോഗ്യാസിലെ വിഷരഹിത മീഥെന്‍ വാതകമാണ് ഇന്ധനമാക്കി മറ്റുന്നത്. ഏകദേശം 13 ലക്ഷം രൂപയാണ് ബയോഗ്യാസ് ബസിന്റെ ആകെ നിര്‍മാണ ചെലവ്. ഈ വര്‍ഷം അവസാനത്തോടെ സംസ്ഥാത്തെ വിവിധ ഭാഗങ്ങളില്‍ ഇത്തരം പതിനാറ് ബസുകള്‍ സര്‍വ്വീസ് നടത്താനാണ് ഫൊണിക്‌സ് ഗ്രൂപ്പിന്റെ ലക്ഷ്യം.