ശില്‍പശ്രേഷ്ഠന്‍ ജടായു | Revealing Jatayu Earth's Centre

By: എച്ച്. ഹരികൃഷ്ണന്‍ / വീഡിയോ എഡിറ്റിങ് - അരുണ്‍രാജ്‌

ശില്‍പി രാജീവ് അഞ്ചലിനൊപ്പം ജടായു എര്‍ത്ത് സെന്ററിലെ വിശേഷങ്ങള്‍ കാണാം - Video Part 1

പര്‍വതാരോഹണം ഉള്‍പ്പെടെയുള്ള സാഹസികവിനോദങ്ങള്‍ ചേരുന്ന ജടായു അഡ്വഞ്ചര്‍ പാര്‍ക്ക് - Revealing Jatayu Earth's Centre - Part 2

ലോകസഞ്ചാരികള്‍ക്കിടയില്‍ ഇനി കേരളം അറിയപ്പെടുന്നത് ഈ ജടായുശില്‍പത്തിലൂടെ ആയിരിക്കും! സമുദ്രനിരപ്പില്‍ നിന്ന് 700 അടിയോളം ഉയരമുള്ള പാറയുടെ മുകളില്‍, അഞ്ചു നില കെട്ടിടത്തിന്റെ വലിപ്പത്തില്‍ പണിതുയര്‍ത്തിയ ശില്‍പത്തിന്റെ ചുവട്ടില്‍ നില്‍ക്കുമ്പോള്‍ എന്റെ മനസിലേക്ക് ഓടിയെത്തിയത് ഈയൊരു ചിന്തയാണ്. 

www.jatayuearthscentre.com, www.jatayuadventurecentre.com

എങ്ങനെ എത്താം?

തിരുവനന്തപുരം  കൊട്ടാരക്കര റൂട്ടില്‍, എംസി റോഡിന്റെ അരികില്‍ തന്നെയാണ് ജടായു എര്‍ത്ത് സെന്ററിലേക്കുള്ള പ്രവേശനം. സൂപ്പര്‍ഫാസ്റ്റ് ഉള്‍പ്പെടെ എല്ലാ ബസ്സുകളും നിര്‍ത്തുന്ന കെഎസ്ആര്‍ടിസി ഡിപ്പോയില്‍ നിന്ന് കഷ്ടിച്ച് ഒരു കിലോമീറ്റര്‍ ദൂരം കാണും.

കുറച്ച് ചരിത്രം

ഒരുകാലത്ത് എംസി റോഡിന്റെ നിര്‍മാണത്തിനായി പൂര്‍ണമായും പൊട്ടിക്കാനിരുന്നതാണ് ജടായുപാറ. അന്നത്തെ കൊല്ലം കളക്ടര്‍ ദേവേന്ദ്രസിങ്ങും കൊട്ടാരക്കര തഹസില്‍ദാര്‍ രാമചന്ദ്രന്‍ നായരും ജടായുപാറയുടെ സംരക്ഷണത്തിനായി രംഗത്തിറങ്ങി. 2004ല്‍ ഡിടിപിസിയുടെ തീര്‍ഥാടന ടൂറിസം ജടായുപാറയില്‍ ആരംഭിച്ചെങ്കിലും ഫലപ്രദമായി മുന്നോട്ടുകൊണ്ടുപോകാനായില്ല. അന്നത്തെ ടൂറിസം മന്ത്രി കെ.സി. വേണുഗോപാലിന്റെയും എംഎല്‍എ പ്രയാര്‍ ഗോപാലകൃഷ്ണന്റെയും ഇക്കോ ടൂറിസം ഡയറക്ടര്‍ കെ.ജി. മോഹന്‍ലാലിന്റേയും താത്പര്യപ്രകാരം അവിടൊരു ശില്‍പം നിര്‍മിക്കാന്‍ തീരുമാനിക്കുകയും അതിനായി കലാകാരന്‍മാരെ ക്ഷണിക്കുകയും ചെയ്തു. മത്സരത്തില്‍ ഒന്നാമനായ രാജീവ് അഞ്ചല്‍ അങ്ങനെ ജടായുവിന്റെ ശില്‍പിയായി.

തുടര്‍ന്ന് കോടിയേരി ബാലകൃഷ്ണന്‍ ടൂറിസം മന്ത്രിയായിരുന്ന ഘട്ടത്തില്‍ സ്ഥലം എംഎല്‍എ കൂടിയായിരുന്ന മന്ത്രി മുല്ലക്കര രത്‌നാകരന്റെയും ടൂറിസം സെക്രട്ടറി വി. വേണു ഐഎഎസ്സിന്റെയും പദ്ധതി പ്രകാരമാണ് ജടായു എര്‍ത്ത് സെന്റര്‍ ബി.ഒ.ടി. പ്രൊജക്ട് യാഥാര്‍ഥ്യമായത്. രാജീവ് അഞ്ചലിന്റെ ഗുരുചന്ദ്രിക എന്ന കമ്പനി ബി.ഒ.ടി. പ്രൊജക്ട് ഏറ്റെടുത്തു. രാജീവ് അഞ്ചല്‍ പ്രധാന സംരംഭകനായി ആരംഭിച്ച പദ്ധതിയിലേക്ക് നൂറോളം പ്രവാസി മലയാളികളും പങ്കാളികളായി.

വിനോദസഞ്ചാര വകുപ്പിന്റെ 65 ഏക്കര്‍ സ്ഥലത്ത് ബി.ഒ.ടി. അടിസ്ഥാനത്തില്‍ 30 വര്‍ഷത്തേക്കാണ് ജടായു എര്‍ത്ത് സെന്റര്‍ നടത്താനുള്ള അനുവാദം സര്‍ക്കാര്‍ നല്‍കിയിരിക്കുന്നത്. 

ആദ്യമായി ഈ പദ്ധതിക്ക് വഴിസൗകര്യം നല്‍കിയ അന്തരിച്ച തോട്ടത്തില്‍ നാരായണപിള്ള, സ്ട്രച്ചറല്‍ എഞ്ചിനീയറായ അന്തരിച്ച ശ്രീകുമാരന്‍ നായര്‍ എന്നിവരുടെയും നാട്ടുകാരുടെയും പിന്തുണ ജടായുവിന്റെ സാക്ഷാത്കാരത്തില്‍ നിര്‍ണായക പങ്കുവഹിച്ചു.

 



View on mathrubhumi.com