'കാവിലി'ന് കാലിടറുന്നു

Posted on: 24 Jul 2012

അനില്‍ കരുമാല്ലൂര്‍




അലങ്കാരമത്സ്യ കയറ്റുമതി രംഗത്ത് പച്ചപിടിച്ചു വന്ന കേരള അക്വാ വെഞ്ചേഴ്‌സ് ഇന്റര്‍നാഷണല്‍ ലിമിറ്റഡ് (കാവില്‍) എന്ന പൊതു -സ്വകാര്യ സംരംഭത്തെച്ചൊല്ലി തര്‍ക്കങ്ങള്‍ ചൂടുപിടിക്കുന്നു. ആലുവ കടുങ്ങല്ലൂരില്‍ പ്രവര്‍ത്തനം തുടങ്ങി രണ്ടുവര്‍ഷം പിന്നിട്ടപ്പോഴേക്കും പദ്ധതിയുടെ താളം തെറ്റിയെന്ന് സംരംഭകരില്‍ ചിലര്‍ പറയുന്നു. എന്നാല്‍, ഇത് തെറ്റായ പ്രചാരണങ്ങളാണെന്നും ഒരു സര്‍ക്കാര്‍ സംരംഭത്തെ തകര്‍ക്കാനുള്ള ഗൂഢശ്രമങ്ങളാണ് ഇതിന് പിന്നിലെന്നും പറഞ്ഞ് 'കാവിലി' ലെ ജീവനക്കാരും രംഗത്തെത്തി.പദ്ധതിയുടെ ആരംഭത്തില്‍ ലക്ഷ്യം വച്ചിരുന്നത്ര കയറ്റുമതി, കമ്പനിക്ക് നടത്താന്‍ കഴിഞ്ഞിട്ടില്ലെങ്കില്‍ കൂടി ശൈശവാവസ്ഥയില്‍ തന്നെ അതിന്റെ പരമാവധി പ്രവര്‍ത്തനങ്ങള്‍ കാഴ്ചവയ്ക്കാന്‍ കഴിഞ്ഞിട്ടുണ്ടെന്നാണ് കമ്പനി മാനേജ്‌മെന്റിന്റെയും ജീവനക്കാരുടെയും അവകാശവാദം.

അലങ്കാര മത്സ്യ ഉത്പാദനവും കയറ്റുമതിയും വര്‍ധിപ്പിക്കുക എന്ന ലക്ഷ്യം കൈവരിക്കുന്നതിനായി സംസ്ഥാനത്ത് അക്വാ ടെക്‌നോളജി പാര്‍ക്കുകള്‍ സ്ഥാപിച്ച് പ്രവര്‍ത്തിക്കുന്നതിനായി സര്‍ക്കാര്‍ രൂപവത്കരിച്ച ഒരു പൊതു-സ്വകാര്യ സംരംഭമാണ് 'കാവില്‍'. മുഖ്യമന്ത്രി ചെയര്‍മാനും ഫിഷറീസ് മന്ത്രി വൈസ് ചെയര്‍മാനുമാണ്. കമ്പനിയുടെ ആസ്ഥാനവും ഒരു അക്വാ ടെക്‌നോളജി പാര്‍ക്കും കൂടിയാണ് കടുങ്ങല്ലൂരില്‍ പ്രവര്‍ത്തിക്കുന്നത്.

മത്സ്യങ്ങളുടെ ഗുണമേന്മ പരിശോധനാ കേന്ദ്രവും ആറ് എക്‌സ്‌പോര്‍ട്ട് ഹബ്ബുകളും ഉള്‍പ്പെടുന്നതാണ് അക്വാ ടെക്‌നോളജി പാര്‍ക്ക്. അതില്‍ അഞ്ച് ഹബ്ബുകള്‍ സ്വകാര്യ വ്യക്തികളും ഒരെണ്ണം മത്സ്യഫെഡുമാണ് ഏറ്റെടുത്ത് നടത്തുന്നത്. കയറ്റുമതിക്ക് ആവശ്യമായ അലങ്കാര മത്സ്യങ്ങളെ സംഭരിച്ച്, കണ്ടീഷന്‍ ചെയ്ത്, പായ്ക്ക് ചെയ്യുന്നതിനുള്ള അടിസ്ഥാന സൗകര്യങ്ങളോടു കൂടിയ യൂണിറ്റുകളാണ് ഇത്.

കയറ്റുമതിക്ക് ആവശ്യമായ സാങ്കേതിക സഹായമെല്ലാം ചെയ്തുകൊടുക്കുന്നത് കാവിലിന്റെ നേതൃത്വത്തിലാണ്. എന്നാല്‍, നേരത്തെയുള്ള എല്ലാ ധാരണകളും തെറ്റിച്ചുകൊണ്ടുള്ള സമീപനമാണ് കമ്പനിയുടെ ഭാഗത്തുനിന്ന് ഉണ്ടാകുന്നതെന്നാണ് സ്വകാര്യ സംരംഭകരുടെ ആരോപണം. രണ്ട് സംരംഭകര്‍ ഇതിനകം തന്നെ ഹബ്ബുകള്‍ ഉപേക്ഷിച്ചു.

കയറ്റുമതി ഒന്നും നടക്കാതെ, തൊഴിലാളികള്‍ക്ക് ശമ്പളം പോലും കൊടുക്കാന്‍ പറ്റാതെ വന്നപ്പോഴാണ് ഈ സംരംഭകര്‍ യൂണിറ്റ് ഉപേക്ഷിച്ചുപോയത്. എന്നാല്‍, രണ്ടുവര്‍ഷം പിന്നിടുമ്പോള്‍ 37 കയറ്റുമതികളിലൂടെ 87,624 യു.എസ്. ഡോളര്‍ മൂല്യമുള്ള 1,76,085 വര്‍ണമത്സ്യങ്ങളെ വിവിധ രാജ്യങ്ങളിലേക്ക് കയറ്റുമതി ചെയ്തതായാണ് കമ്പനിയുടെ കണക്ക്. 25 ലക്ഷം വീതം മുടക്കി ഹബ്ബുകള്‍ പാട്ടത്തിനെടുത്തിരിക്കുന്ന സംരംഭകര്‍ക്ക് ഈ രീതിയില്‍ കയറ്റുമതി നടന്നാല്‍ ലാഭകരമല്ല എന്നാണ് പറയുന്നത്.

പ്രധാന പ്രശ്‌നം മത്സ്യങ്ങളുടെ ദൗര്‍ലഭ്യം

കടുങ്ങല്ലൂരിലെ അക്വാ ടെക്‌നോളജി പാര്‍ക്ക് അഭിമുഖീകരിക്കുന്ന പ്രധാന പ്രശ്‌നം മത്സ്യ കുഞ്ഞുങ്ങളുടെ ദൗര്‍ലഭ്യമാണ്. കണ്ടീഷന്‍ ചെയ്‌തെടുക്കുന്ന മത്സ്യങ്ങള്‍ ഇവിടെനിന്ന് കയറ്റി അയയ്ക്കാന്‍ സൗകര്യങ്ങള്‍ ഉണ്ടെങ്കിലും അതിനാവശ്യമായ മത്സ്യങ്ങള്‍ കിട്ടുന്നില്ല. നിലവില്‍ മലപ്പുറം ജില്ലയിലെ പരപ്പനങ്ങാടിയിലും കണ്ണൂര്‍ ഇരിട്ടിയിലുമുള്ള ഫാമുകളിലും നിന്നാണ് ഇവിടേക്ക് മത്സ്യക്കുഞ്ഞുങ്ങളെ എത്തിക്കുന്നത്. ഈ കുഞ്ഞുങ്ങളെ കാവില്‍ നേതൃത്വം കൊടുക്കുന്ന ഹോം സ്റ്റഡുകളിലാണ് വളര്‍ത്തുന്നത്.

താത്പര്യമുള്ള കര്‍ഷകരെ കണ്ടെത്തി സംസ്ഥാനത്തിന്റെ വിവിധ ഭാഗങ്ങളില്‍ ഇത്തരത്തിലുള്ള ഹോം സ്റ്റഡുകള്‍ പ്രവര്‍ത്തിക്കുന്നുണ്ട്. കോട്ടയം ജില്ലയിലാണ് ഇത് കൂടുതലായിട്ടുള്ളത്. മത്സ്യങ്ങള്‍ സുരക്ഷിതമായി വളര്‍ത്തുന്നതിനാവശ്യമായ ടാങ്ക് ഉള്‍പ്പെടെ മറ്റ് സൗകര്യങ്ങള്‍ ഒരുക്കാന്‍ ഒരുലക്ഷം രൂപ വരെ ചെലവ് വരും. ഇതിന്റെ പകുതി തുക കാവില്‍ നല്‍കിക്കൊണ്ടാണ് ഹോം സ്റ്റഡുകള്‍ പ്രവര്‍ത്തിപ്പിക്കുന്നത്.

ഹോം സ്റ്റഡുകളില്‍ നിന്ന് പൂര്‍ണ വളര്‍ച്ച എത്തിയ മത്സ്യങ്ങളാണ് എക്‌സ്‌പോര്‍ട്ടിങ് ഹബ്ബുകളിലേക്ക് എത്തിക്കുന്നത്. എന്നാല്‍, പകുതിയിലേറെ ഹോം സ്റ്റഡുകള്‍ ഇപ്പോള്‍ പ്രവര്‍ത്തിക്കുന്നില്ല എന്നാണ് ചില സംരംഭകര്‍ പറയുന്നത്. അതുകൊണ്ടു തന്നെയാണ് ശരിയായ രീതിയില്‍ കയറ്റുമതി നടക്കാത്തതും.

ഹോം സ്റ്റഡുകള്‍ നാമമാത്രമായി ചുരുങ്ങിയിട്ടും ആ പ്രശ്‌നം പരിഹരിക്കാന്‍ കമ്പനിയുടെ ഭാഗത്തുനിന്ന് നടപടികളൊന്നും ഉണ്ടാകുന്നില്ല എന്നും ആരോപണമുണ്ട്. കയറ്റുമതിക്ക് ആവശ്യമായ മീന്‍ പൂര്‍ണമായും കാവിലിന്റെ നേതൃത്വത്തില്‍ എത്തിച്ചുകൊടുക്കാമെന്ന ധാരണയിലായിരുന്നു സ്വകാര്യ സംരംഭകര്‍ ഈ രംഗത്തേക്ക് വന്നതെന്ന് പറയുന്നു. എന്നാല്‍, മത്സ്യങ്ങള്‍ കണ്ടെത്തേണ്ടത് സംരംഭകരുടെ ചുമതലയാണെന്നും കയറ്റുമതിക്ക് ആവശ്യമായ സാങ്കേതിക സഹായം മാത്രമേകാവില്‍ നല്‍കുകയുള്ളൂ എന്നാണ് കമ്പനി അധികൃതരുടെ വിശദീകരണം.


Stories in this Section