a Mathrubhumi initiative
അനുപമയെന്ന മുരിങ്ങയിനം
Posted on: 18 Feb 2012
വിജയശ്രീ വി., കാര്ഷിക കോളേജ്, വെള്ളായണി
വളരെയധികം പോഷകമൂല്യവും ഔഷധമൂല്യവുമുള്ള മുരിങ്ങയുടെ ഇലയും പൂവും കായും എല്ലാം തന്നെ പച്ചക്കറികളായി ഉപയോഗിക്കാം. ദീര്ഘകാലവിളയായി വളര്ത്താവുന്ന മുരിങ്ങയുടെ ഒരു ചെടി മതിയാവും ഒരു കുടുംബത്തിന്റെ ആവശ്യങ്ങള്ക്ക്. അനുപമ എന്നയിനത്തിന്റെ പ്രത്യേകത, വളരെ നേരത്തേ തന്നെ, അതായത് നട്ട് ആറ് ഏഴ് മാസംകൊണ്ട് തന്നെ കായ്ക്കുമെന്നുള്ളതും നല്ല കായ്ഫലമുണ്ടാകുമെന്നതുമാണ്. ഹെക്ടറില് നിന്നും 50 - 55 ടണ് വിളവാണ് കണക്കാക്കാവുന്നത്. ഒരു ചെടിയില് നിന്നും 25 - 30 കിലോ കായ്കള് വരെ 3 - 5 വിളവെടുപ്പുകളില്നിന്നും ലഭിക്കും. ഏപ്രില്-മെയാണ് നടീലിന് പറ്റിയ സമയം. കുറ്റിച്ചെടിയായി വളരുന്ന ഇവയില്നിന്നും നവംബര് മുതല് മെയ് വരെയുള്ള സമയത്താണ് കായ്കള് കൂടുതലായി ലഭിക്കുക. കാര്യമായ രോഗകീടബാധകളൊന്നും ഈ ഇനത്തില് കാണാറില്ല.കാന്താരിമുളക് -വെള്ളായണി സമൃദ്ധ
കാന്താരി മലയാളികള്ക്ക് ഒഴിച്ചുകൂടാനാകാത്ത മുളകിനമാണ്. ഏതുതരം കറിക്കും പ്രത്യേക രുചിയും മണവുമൊക്കെ നല്കാന് ഇവയ്ക്ക് കഴിയും. രക്തസമ്മര്ദം കുറയ്ക്കുന്നതിനും മറ്റും ഔഷധമായും ഇവ ഉപയോഗിക്കാറുണ്ട്. എല്ലാ കാലത്തും സമൃദ്ധമായ മുളക് തരുന്ന കാന്താരിയുടെ ഇനമാണ് വെള്ളായണി സമൃദ്ധ. അമിതമായ എരിവില്ലാത്ത ഇടത്തരം വലിപ്പമുള്ള മുളകുകള്ക്ക് ക്രീം കലര്ന്ന വെള്ള നിറമാണ്. ഇടത്തരം വലിപ്പമുള്ള ചെടികള്ക്ക് നന്നായി ശാഖകള് ഉണ്ടാകുന്നു. ദീര്ഘകാലവിളയായി വളര്ത്താവുന്ന ഈ ഇനം തണലുള്ള സ്ഥലങ്ങളില് നന്നായി വളരും. വിത്തിട്ട് 80 ദിവസത്തോടെ പൂവിടും. 105 ദിവസത്തോടെ മുളക് പിടിത്തവും നന്നായി നടക്കുന്നു. ഒരു ചെടിയില്നിന്നും 670 മുളക് വരെ ഉണ്ടാകുന്ന ഇതിന്റെ ഏകദേശ വിളവ് ഒരു ഹെക്ടറിന് 30.2 ടണ്ണാണ്.
വുഡ് ആപ്പിള്
നാരകവര്ഗത്തില്പ്പെട്ടതെങ്കിലും നാട്ടില് അപൂര്വമായ സസ്യമാണ് 'വുഡ് ആപ്പിള്'. അയല് സംസ്ഥാനങ്ങളില് വ്യാപകമായി വളരുന്ന ഇവയ്ക്ക് 'വിളാങ്കായ്' എന്നും പേരുണ്ട്. പത്തു മീറ്ററോളം ഉയരത്തില് ശാഖകളോടെ വളരുന്ന ഇവയില് മുള്ളുകളുണ്ടാകും. ശാഖാഗ്രങ്ങളില് ഉണ്ടാകുന്ന കായ്കള്ക്ക് ഗോളാകൃതിയാണ്. കടുപ്പമേറിയ പുറംതോടിനുള്ളില് കാണുന്ന കഴമ്പിന് മധുരവും പുളിയും ചവര്പ്പും കലര്ന്ന രുചിയാണ്. കൊഴുപ്പ്, ജീവകങ്ങള്, ധാതുലവണങ്ങള് തുടങ്ങിയവയുടെ കലവറയായ പഴങ്ങള് ഉദരരോഗങ്ങള്ക്ക് ഔഷധം കൂടിയാണ്. മൂപ്പെത്തിയ കായ്കള് മരങ്ങളില് നിന്ന് പഴുക്കാറില്ല. ശേഖരിച്ചു ഒരാഴ്ച സൂക്ഷിച്ചശേഷം പഴുക്കുമ്പോള് മുറിച്ചു കഴിക്കാം. വുഡ് ആപ്പിളിന്റെ വിത്ത് മുളപ്പിച്ചതോ ഒട്ടുതൈകളോ കൃഷിക്ക് യോജിച്ചതാണ്. വരണ്ട മണ്ണാണ് ഇവ വളരാന് കൂടുതല് അനുയോജ്യം.
Stories in this Section