പഴയ വീടുകളുടെ മോന്തായത്തിന്റെ മുഖപ്പില്‍ നമ്മുടെ കാരണവന്മാര്‍ ദ്വാരങ്ങളിടുക പതിവായിരുന്നു. വായുവും വെളിച്ചവും കയറാനാണിത്. ഈ ദ്വാരങ്ങളുടെ നടുവില്‍ വളരെ വലിയ ഒരു ദ്വാരമാണിട്ടിരിക്കുക. ഇതെന്തിനെന്നറിയുമോ? ഇതിലൂടെ പറന്നിറങ്ങുന്ന വെള്ളിമൂങ്ങകള്‍ക്ക് തട്ടിന്‍പുറത്ത് കൂടൊരുക്കാന്‍ വേണ്ടിയായിരുന്നു. ഇത്തരം പഴയവീടുകളുടെ തട്ടിന്‍പുറത്ത് എലികളുടെ അവശിഷ്ടങ്ങളും മൂങ്ങകളുടെ ഉച്ഛിഷ്ടവും കാണാം.

കര്‍ഷകന്റെ ആജന്മശത്രുവായ എലിയെ തട്ടിന്‍പുറത്തിട്ട് വകവരുത്തുന്ന വെള്ളിമൂങ്ങയ്ക്ക് അങ്ങനെയാണ് 'പത്തായപക്ഷി' എന്ന ഓമനപ്പേര് കിട്ടിയത്. അക്കാലത്ത് പത്തായത്തിലും മറ്റും ഭദ്രമായി സൂക്ഷിച്ചിരുന്ന അരിയും ഇതര കാര്‍ഷികോല്പന്നങ്ങളും സംരക്ഷിക്കുന്നു എന്നര്‍ത്ഥത്തിലാണ് വെള്ളിമൂങ്ങയ്ക്ക് ഈ പേര് വീണത്. വടക്കന്‍ കേരളത്തിലാണ് ഈ പേര് സാധാരണം. പത്തായവും പത്തായപ്പുരയുമൊക്കെ വിസ്മൃതിയിലായ വര്‍ത്തമാനകാലത്ത് വെള്ളിമൂങ്ങയുടെ പ്രാധാന്യം നാം ഓര്‍ക്കാറില്ല.

ഇപ്പോള്‍ അപൂര്‍വ്വമായി വെളിച്ചത്തെത്തുന്ന വെള്ളിമൂങ്ങയെ പലയിടത്തും നാട്ടുകാര്‍ പിടികൂടി എന്നൊക്കെ പത്രവാര്‍ത്തകള്‍ വരുമ്പോള്‍ മാത്രമാണ് പലരും ഈ അപൂര്‍വ്വ ജീവിയെക്കുറിച്ചോര്‍ക്കുന്നത്. മറ്റു മൂങ്ങകളില്‍ നിന്ന് വ്യത്യസ്തനാണ് കര്‍ഷകസുഹൃത്തായ വെള്ളിമൂങ്ങ. ഹൃദയാകൃതിയാണ് ഇതിന്റെ മുഖത്തിന്. കാക്കയോളം വലിപ്പം. മുഖം തൂവെള്ളനിറവും. ഇതിനു ചുറ്റും തവിട്ടു നിറത്തിലൊരു വലയമുണ്ട്. ബാക്കി ഭാഗമെല്ലാം തിളങ്ങുന്ന വെള്ളനിറവും. അങ്ങിങ്ങ് തവിട്ടുപുള്ളികളും. ആകെ ഒരു ആനച്ചന്തം. ചുണ്ടും കാലുകളും ശക്തിയുള്ളതാണ്. ഇംഗ്ലീഷില്‍ 'ബാണ്‍ ഔള്‍' എന്നാണ് പേര്. രാത്രിഞ്ചരനാണ്. രാത്രിയേ പുറത്തിറങ്ങൂ. എലിയും പാറ്റയും പ്രധാന ഭക്ഷണം. കെട്ടിടങ്ങളുടെ മോന്തായത്തിലും ഭിത്തിയിലെ വിടവുകളിലുമാണ് ഇവ കൂടുകൂട്ടുക. ജീര്‍ണിച്ച കെട്ടിടങ്ങളിലും സസുഖം പാര്‍ക്കും.

barn owl
Photo credit: commons.wikimedia.org

എലികളുടെ പ്രകൃത്യായുള്ള ശത്രുക്കളില്‍ പൂച്ചയേക്കാള്‍ പ്രഗത്ഭനാണ് വെള്ളിമൂങ്ങ. വീട്ടെലികള്‍ക്കു പുറമെ പറമ്പിലെയും കൃഷിയിടങ്ങളിലെയുമൊക്കെ എലികളെ തിന്നുന്നതില്‍ മുന്‍പന്തിയില്‍. പാടത്ത് മടല്‍ക്കുറ്റി (മൂങ്ങാക്കുറ്റി) നാട്ടി ഇവര്‍ക്ക് സ്വസ്ഥമായി വന്നിരുന്ന് എലിയെ പിടിക്കാന്‍ പഴയകര്‍ഷകര്‍ സൗകര്യമൊരുക്കിയിരുന്നു. ഇത്തരം 'മൂങ്ങാക്കുറ്റികള്‍' ഇപ്പോഴും കൃഷിയിടങ്ങളില്‍ നാട്ടി എലികളെ പിടിക്കാം. സൈ്വര്യമായി കഴിയാനുള്ള താവളങ്ങള്‍ ഇല്ലാതായതാണ് വെള്ളിമൂങ്ങകള്‍ വെളിച്ചത്ത് ഇടയ്ക്കിടെ വരാന്‍ കാരണം.

 കറുത്ത കലത്തില്‍ വെള്ളപ്പൊട്ടുകള്‍ കുത്തി ഉയരമുള്ള മരക്കൊമ്പുകളില്‍ വെച്ചാല്‍ വെള്ളിമൂങ്ങയെ ആകര്‍ഷിക്കാം. ശാസ്ത്രീയമായി മൂങ്ങാപ്പെട്ടികളൊരുക്കിയും ഇവയെ സ്വീകരിക്കാം. തമിഴ്‌നാട്ടിലും മറ്റും നെല്പാടങ്ങളില്‍ ചെലവുകുറഞ്ഞ കൃത്രിമ മൂങ്ങാക്കൂട് സ്ഥാപിക്കുക പതിവുണ്ട്. അര ഇഞ്ച് കനമുള്ള പലകയില്‍ തീര്‍ത്ത കൂടില്‍ മൂങ്ങയ്ക്ക് കയറാനും ഇറങ്ങാനും സൗകര്യമുണ്ട്. ഉയരമുള്ള കെട്ടിടങ്ങളില്‍ പെട്ടി വെച്ച് പിടിക്കുന്ന മൂങ്ങകളെ ഇതുപോലുള്ള കൂട് അവയുടെ ഇഷ്ടസ്ഥാനത്തൊരുക്കി ശീലിപ്പിച്ചാല്‍ വെള്ളിമൂങ്ങകള്‍ കൃഷിയിടങ്ങളിലെ നിര്‍ദ്ദോഷിയായ 'വാച്ച്മാന്‍' ആയിക്കൊള്ളും.