ഓസ്‌ട്രേലിയയിലെ വ്യത്യസ്തമായ ഒരു ഫാമിനെ പരിചയപ്പെടാം. കന്നുകാലികള്‍ക്ക് ചോക്‌ളേറ്റ് നല്‍കി ബീഫിന്റെ രുചി കൂട്ടാനുള്ള ശ്രമത്തിലാണ് ഇവര്‍. വെറും ശ്രമം മാത്രമല്ല. പരീക്ഷിച്ചു വിജയിക്കുകയും ചെയ്തു. 

mayura farm
മയൂര ഫാം

1845 ലാണ് മയൂര ഫാം പ്രവര്‍ത്തനമാരംഭിച്ചത്‌. 3,000 ഹെക്ടറോളം സ്ഥലത്ത് വ്യാപിച്ചു കിടക്കുന്ന ഈ ഫാമില്‍ ഇന്ന് 20 ജോലിക്കാരാണുള്ളത്. ഓസ്‌ട്രേലിയയിലെ മറ്റു കന്നുകാലി ഫാമുകളേക്കാള്‍ ചെറുതാണ് മയൂര ഫാം. വാഗ്യു എന്ന പദം കൊണ്ടുദ്ദേശിക്കുന്നത് ജപ്പാനിലെ പശു എന്നാണ്. കറുപ്പും വെളുപ്പും നിറത്തിലുള്ള രണ്ടു പ്രധാനപ്പെട്ട വിഭാഗത്തിലുള്ള പശുക്കളാണുള്ളത്. കറുപ്പു നിറത്തിലുള്ള പശുക്കളാണ് ഉയര്‍ന്ന ഗുണനിലവാരമുള്ളത്. 

മയൂര ഫാമിന്റെ ഉടമസ്ഥനായ സ്‌കോട്ട് ഡി ബ്രൂയിന്‍ ജപ്പാനില്‍ നിന്ന് കൊണ്ടുവന്ന ഗവേഷകന്‍ രണ്ടു വര്‍ഷത്തെ ഗവേഷണഫലമായാണ് ഇത്തരമൊരു കണ്ടെത്തല്‍ നടത്തിയത്. രണ്ടുകിലോയോളം ചോക്ലേറ്റ് മിക്‌സ് ചെയ്ത ഭക്ഷണമാണ് ഈ ഫാമിലെ കന്നുകാലികള്‍ കഴിക്കുന്നത്. സാധാരണ ഭക്ഷണം കഴിക്കുന്ന കന്നുകാലികളേക്കാള്‍ 70% കൂടുതല്‍ വളര്‍ച്ച  ഇവയ്ക്കുണ്ട്. 

cattle
പൊടിച്ച ചോക്‌ളേറ്റ്‌

പൊടിച്ച കാഡ്ബറി ചോക്ലേറ്റുകളാണ് കന്നുകാലികള്‍ക്ക് നല്‍കുന്നത്. സുഗന്ധത്തിന്റെ കാര്യത്തിലും മുന്‍പന്തിയിലാണ് ഈ ഭക്ഷണം. വെറുമൊരു പരീക്ഷണമായാണ് കന്നുകാലികളെ ഇവര്‍ ചോക്‌ളേറ്റ്  തീറ്റിച്ചത്. എന്നാല്‍ ഓസ്‌ട്രേലിയയിലെ ഇറച്ചിപ്രിയര്‍ ഇത്തരം ബീഫ് മാത്രം മതിയെന്ന ആവശ്യവുമായി മുന്നോട്ടുവന്നിരിക്കുകയാണ്. സാധാരണക്കാര്‍ക്ക് താങ്ങാവുന്നതിന്റെ അപ്പുറത്താണ് ബീഫിന്റെ വില. കൊഴുപ്പിന്റെയും ഇറച്ചിയുടെയും ഒരു യഥാര്‍ഥ കോമ്പിനേഷനായാണ് മയൂര ഫാമിലെ കന്നുകാലികള്‍ വളരുന്നത്.

(കടപ്പാട്: സി.എന്‍.എന്‍)